Nıý-Iork pen Bostonda rekordtyq kólemde qar jaýdy
Qar kólemi jaǵynan rekordtar kitabyna enbese de, osy maýsymdaǵy eń qalyń qar boldy.
Soltústiktegi Nıý-Djersı shtatynan ońtústiktegi Men shtatyna deıingi aımaq qar qursaýynda qalyp, joldaǵy tártipsizdikke ulasty. Biraq jaǵdaı jol máselesimen shektelip qalǵan joq.
Foto:Eduardo MunozAlvarez/VIEWpress
Seısenbi kúni soltústik-shyǵystaǵy birneshe aeroport reısterdiń keshigetinin jáne toqtatylǵanyn habarlady. Flight Aware dereginshe, eń kóp reıs, ıaǵnı 160-tan asa ushaq ushpaı qalǵan áýejaı – Nıý-Iorktegi La-Gýardııa áýejaıy.
Bostondyq Logan halyqaralyq áýejaıy, Djon F.Kennedı atyndaǵy halyqaralyq áýejaı men Nıýark Lıbertı halyqaralyq áýejaıy seısenbi kúni reısterdiń aıtarlyqtaı keshigetinin jáne keıbiriniń múldem ushpaıtynyn málimdedi. Djon F. Kennedı áýejaıynda 400-den asa keshigý bolsa, Bostonda 300-den asa reıs ushý mezgilinen keshikken.
Foto:Leonardo Munoz / AFP via Getty Images
Soltústik-shyǵystaǵy kóptegen mektep pen mekemeler jabyldy nemese seısenbi tańerteńgi qardan keıin ashylýyn keıinge qaldyrdy.
Rod-Aılend shtatyndaǵy Batys Grınvıchte de 20 santımetrden asatyn qar túsken. Shamamen osyndaı kólemdegi qar Massachýset shtatyndaǵy Pleınfıld qalasy men Nıý-Iorkten bir jarym saǵattyq jerdegi Chesterde, sondaı-aq Konnektıkýt shtatynyń birqatar bóliginde jaýǵan.
Foto:Steven Senne
Meteorologtardyń aıtýynsha, Nıý-Iork, Boston, Fıladelfııa men Vashıngton, Kolýmbııa okrýgi syndy soltústik-shyǵystaǵy qalalarda qysta múldem qar jaýmaǵan. Sol sebepti qystyń sońǵy kúni osy qala turǵyndary úshin eń qarly kún boldy. Mundaı qar keıingi ret Nıý-Iorkte 1998 jyldyń 22 naýryzynda jaýǵan.
Seısenbi meteorologııalyq qystyń sońǵy kúni ekenine qaramastan, AccuWeather sınoptıkteri soltústik-shyǵysta áli de qystyń kún raıy saqtalatynyn aıtty. Meteorologtar apta sońynda jaǵalaýǵa qalyń qar jaýyp, jergilikti turǵyndar úshin aıtarlyqtaı másele týdyratynyn aıtyp otyr.
Foto:Spencer Platt/Getty Images