N.Nazarbaevtyń halyqaralyq bastamalary Nıý-Iorkte joǵary deńgeıde talqylandy

ASTANA. QazAqparat - 2016 jyly 11-13 qańtarda QR Prezıdenti N.Nazarbaevtyń halyqaralyq bastamalaryn jáne 2017-2018 jj. arnalǵan BUU Qaýipsizdik keńesiniń turaqty emes músheligine Qazaqstan kandıdatýrasyn alǵa jyljytý maqsatynda QR syrtqy ister mınıstriniń orynbasary Erjan Ashyqbaev jumys saparymen Nıý-Iorkke bardy.

QR SІM baspasóz qyzmeti habarlaǵandaı, E. Ashyqbaev Afrıkalyq topqa múshe memleketterdiń elshileri, sonymen qatar Latyn Amerıkasy men Karıb basseıni elderiniń toby úshin QR Prezıdenti N.Nazarbaevtyń halyqaralyq bastamalary týraly brıfıng ótkizdi. Jıylǵandar Elbasynyń terrorızmmen jáne ekstremızmmen kúres boıynsha bastamalaryna qyzyǵýshylyq tanytty.

E. Ashyqbaev Afrıkanyń Ońtústigin damytý qaýymdastyǵyna múshe memleketterdiń turaqty ókilderimen kezdesti. Onda 2030 jylǵa deıingi turaqty damý salasyndaǵy BUU Kún tártibi aıasynda Qazaqstannyń Afrıka elderimen seriktestik qatynastarynyń damý múmkindigi qaraldy.

Sondaı-aq QR Prezıdenti N.Nazarbaevtyń halyqaralyq bastamalary jáne olardy BUU aıasynda júzege asyrý múmkindikteri E Ashyqbaevtyń BUU Bas hatshysynyń saıası máseleler boıynsha kómekshisi Mıroslav Enchamen kezdesýinde talqylandy.