N.Nazarbaev: «Kezekten tys prezıdent saılaýyn ótkizgen jón» degen paıymǵa keldim
«Búgin men Senat, Májilis basshylarymen, Premer-Mınıstrmen, Konstıtýtsııalyq keńes tóraǵasymen keńes ótkizdim. Taıaýda Senat tóraǵasynyń saýalyna oraı Konstıtýtsııalyq keńes kezekten tys prezıdenttik saılaý ótkizýge qatysty túbegeıli túsinikteme berdi», - dedi Elbasy.
QR Prezıdentiniń atap ótýinshe, prezıdenttik jáne parlamenttik saılaý ótkizýdiń kúntizbelik merzimi 2016 jylǵa saı keledi. Al mundaı jaıtqa elimizdiń Ata zańy jol bermeıdi.
«Meniń Memleket basshysy laýazymyndaǵy konstıtýtsııalyq ókilettigim de 2016 jyly aıaqtalady. Halyq eki usynys aıtýda. Birinshisi - el prezıdentin kezekten tys saılaýyn ótkizý. Ekinshisi - Prezıdent ókilettigi merzimin uzartý týraly referendým ótkizý. Eki usynysty da júzege asyrýǵa bolady. Degenmen, Konstıtýtsııa talaptaryna saı keletin eń durysy saılaý ótkizý bolyp sanalady», - dedi QR Prezıdenti.
Elbasy sondyqtan da halyq múddesin, olardyń ótinishterin eskere otyryp kezekten tys prezıdenttik saılaý ótkizý týraly sheshim qabyldaǵanyn atap ótti.
«Men negizgi zańdy múltiksiz oryndaý úshin jáne el Konstıtýtsııasynyń 41-baby 3.1-tarmaǵyna sáıkes 2015 jyldyń 26 sáýirine kezekten tys prezıdenttik saılaýdy taǵaıyndaý týraly Jarlyqqa qol qoıdym. Qazaqstan úshin saılaý árýaqytta da qoǵamdyq birlik pen kelisimniń joǵary tetigi boldy. Qazirde jáne aldaǵy ýaqytta da solaı bolaryna senimdimin. Saılaý - bul konstıtýtsııalyq patrıottyq akt. Ony zańnamaǵa sáıkes ashyq ári ádil ótkizý qajet. Otandyq jáne halyqaralyq baıqaýshylar keńinen qatysýy tıis. Aldaǵy saılaýǵa ózimniń qatysýyma baılanysty sheshimdi men sál keıinirek elimizdiń Konstıtýtsııasyna jáne zańdaryna saı qabyldaımyn», - dedi N.Nazarbaev.
«Qaıta qaharyna mingen álemdik daǵdarys jaǵdaıynda birlik bizge burynǵysynan beter qundy. Memlekettiń tynyshtyǵy men eldiń birligin saqtap, damytý Prezıdenti bastap, eli qostaǵan kezde ǵana baıandy bolmaq. Jaýapkershilik búkil halyqqa da júkteledi. Osyny umytpaıyq. Aldaǵy bıik belester men asqar asýlar úshin biz barlyq kedergilerdi baǵyndyryp, alǵa basýǵa tıispiz.
Quzyrly organdar Qazaqstan halqy Assambleıasynyń bastamasy elimizdiń Konstıtýtsııasyna jáne saılaý týraly zańǵa saı degen qorytyndy shyǵardy. Men saılaýǵa qatysty «ıá» men «joqty» muqııat oı tarazysyna saldym. Sóıtip, «kezekten tys prezıdent saılaýyn ótkizgen jón» degen paıymǵa keldim. Saılaý elimizdi uly isterge uıystyryp, baıandy bolashaq jolynda biriktire túserine senemin. Qazaqstandyqtardy el tarıhyndaǵy taǵy bir taǵdyrly oqıǵaǵa jaýapkershilikpen qarap, belsene qatysýǵa shaqyramyn.
Barshańyzǵa birlik pen bereke, shańyraqtaryńyzǵa shattyq tileımin», - dedi Elbasy halyqqa arnalǵan úndeýinde.