N.Nazarbaev: Ekonomıkalyq forýmdar Qazaqstanǵa senim men qyzyǵýshylyq týyndatýǵa septigin tıgizedi
Aqorda baspasóz qyzmetiniń habarlaýynsha, brıfıng barysynda Memleket basshysy Halyqaralyq ekonomıkalyq forýmǵa qatysýynyń negizgi qorytyndylary, sonymen birge osy shara aıasynda ótkizilgen kelissózder nátıjeleri jaıynda sóz qozǵady.
«Eń birinshi kezekte biz osynaý qıyn-qystaý kezeńde Sankt-Peterbor ekonomıkalyq forýmyn jáne Reseı basshylyǵyn qoldadyq. Munan bólek, forýmda sóz sóıleýim barysynda men birqatar máseledegi Qazaqstannyń ustanymyn taǵy bir márte bildirip, bizdiń elimizdiń qandaı ınvestıtsııalyq múmkinshilikke ıe ekendigin jáne on odan ary damytý úshin bizderdiń qandaı qadamdar jasap jatqandyǵymyzdy aıtyp berdim», - dedi Qazaqstan Prezıdenti.
Osy rette Memleket basshysy forým aıasynda reseılik iskerlik orta ókilderimen jemisti kezdesýler ótkendigin de eske salyp ótti.
«Onyń ishinde men reseılik bıznes kapıtandary eldiń iri memlekettik korporatsııalary men jeke kompanııalarynyń basshylarymen kezdestim. Onyń basym kópshiligi Qazaqstanda jumys isteıdi. Búginde bizde Reseımen birlesken 6 myńdaı kásiporyn bar. Josparlanǵan jobalar qorjyny 25 mlrd dollarǵa jýyqtaıdy. Onyń 6-7 mlrd dollary shaǵyn jáne orta bızneske tıesili. Bul kúrdeli daǵdarys ýaqytynda zor demeý. Biz munymen jumysty jalǵastyratyn bolamyz. 4 qazanda Qazaqstanda dástúrli Qazaqstan-Reseı óńiraralyq yntymaqtastyq forýmy ótetin bolady. Onyń aıasynda óte kóp iskerlik kezdesýler ótedi. Oǵan biz reseılik kompanııalarmen naqty ýaǵdalastyqqa qol jetkizý úshin daıyndalatyn bolamyz», - dedi Elbasy.
Munan bólek, Memleket basshysy BUU Bas hatshysy pan Gı Mýnmen jáne RF Prezıdenti Vladımır Pýtınmen aradaǵy kelissózderge de toqtaldy.
«Pan Gı Mýnmen kezdesý barysynda biz álemdegi qazirgi ahýalǵa jáne uıymmen yntymaqtastyqty odan ary damytý keleshegine qatysty pikir almastyq. Reseı Prezıdentimen kelissózder barysynda Tashkentte ótetin Shanhaı yntymaqtastyq uıymyna múshe memleketter basshylary keńesiniń kún tártibindegi máselelerdi talqyladyq», - dedi N.Nazarbaev.