N. Nazarbaev: Búginde óńdeý ónerkásibinde sheteldik ınvestorlardyń qatysýymen 22 jańa joba júzege asyrýǵa daıyndalyp jatyr
Bul týraly Aqordanyń baspasóz qyzmetinen habarlady.
Іs-shara aldynda Memleket basshysy jańa aıshyqty jobalarmen jáne otandyq jeńil ónerkásip ónimderimen tanysty, sondaı-aq «Qazaqstanda jasalǵan» atty kórmeni aralap kórdi.
Jalpyulttyq telekópir aıasynda Indýstrııalandyrý kartasy men «Nurly jol» baǵdarlamasynyń birqatar jobalary iske qosyldy. Sonymen qatar jumys istep turǵan óndiristerdiń qyzmeti tanystyryldy.
Jınalǵandarǵa arnaǵan sózinde Qazaqstan Prezıdenti birinshi ónerkásiptik besjyldyq kezinde shamamen 33 mıllıard dollar sheteldik ınvestıtsııa tartylyp, onyń jartysy eldi ındýstrııalyq-ınnovatsııalyq damytý baǵdarlamasyna tıesili bolǵanyna nazar aýdardy.
Memleket basshysy ındýstrııalandyrýdyń ekinshi besjyldyǵy burynǵydan da naqtyraq kóriniske ıe ekenin aıtty.
- Basymdyǵy bar alty sala anyqtaldy, olar - munaı óńdeý jáne metallýrgııa kesheni, tamaq jáne hımııa ónerkásibi, ónerkásiptik jabdyqtar jáne qurylys materıaldary óndirisi. Báriniń negizinde klasterlik tájirıbe jatyr. Jańa baǵdarlamada biz birinshi besjyldyqtyń sabaqtaryn barynsha eskerip, jınaqtalǵan tájirıbeni qoldanýǵa tyrystyq, - dedi Nursultan Nazarbaev.
Qazaqstan Prezıdenti búginde óńdeý ónerkásibinde sheteldik ınvestorlardyń qatysýymen 22 jańa joba júzege asyrýǵa daıyndalyp jatqanyna atap ótti.
- Júıe quraýshy birqatar iri jobalar boıynsha jumys júrgizilýde. Máselen, «Reno-Nıssan» alıansymen birlesip, tolyq tsıkldy avtozaýyttyń jáne avtoquramdaýyshtar shyǵaratyn tehnoparktiń qurylysy iske qosylady. Italııanyń «Tenarıs» kompanııasy premıým sanatty qubyr óndiretin zaýytqa ınvestıtsııa salady. Aǵylshyndyq «Dando Drılıngpen» birlesip, burǵylaýshy qondyrǵylar óndiretin zaýyt iske qosylady. Reseılik «Evrohım» mıneraldyq tyǵaıtqyshtar óndirýdi josparlap otyr. Kanadanyń «Kýdý Indastrız» kompanııasy munaı-gaz salasyna arnalǵan vıntti-sorǵylar óndirisin jolǵa qoıýǵa nıetti. «Jibek joly» baǵdarlamasy boıynsha yntymaqtastyq aıasynda qytaılyq seriktestermen jobalardyń úlken bir toby júzege asyrylýda, - dedi Memleket basshysy.
Nursultan Nazarbaev ındýstrııalandyrýdy Strategııa-2050-diń eldi álemdegi barynsha damyǵan 30 memleket qataryna qosý jónindegi basty maqsattaryna jetýge baǵyttalǵan búkil memlekettik saıasatynyń ózegi retinde atady.
Qazaqstan Prezıdenti jumys istep turǵan kásiporyndardyń tıimdiligi men ónimdiligin kóterýdiń qajettiligin atap aıtty.
- Bul úshin uqypty óndiris júıelerin, robottandyrý jáne avtomattandyrý elementterin engizý, tehnologııalyq jelilerdi jańǵyrtý talap etiledi. Ásirese bul bizdiń metallýrgııa, munaı óńdeý, hımııa sııaqty dástúrli salalarymyzǵa qatysty, - dedi Nursultan Nazarbaev.
Memleket basshysy Qazaqstan úshin túbegeıli jańa - munaı-gaz hımııasy, avtomobıl qurastyrý jáne taǵy basqa ónerkásip salalaryn qurý men damytýdyń mańyzdylyǵyna toqtaldy.
- Mundaǵy sheshimniń máni - jahandyq oıynshylarmen birge birneshe iri strategııalyq jobalardy júzege asyrýda. Úkimetke, ulttyq holdıngterge osyndaı jobalardyń tizbesin anyqtap, olardy júzege asyrýǵa jaýaptylardy bekitýdi tapsyramyn. Zamanaýı tehnologııalarǵa, kompetentsııalar men jahandyq ótkizý naryqtaryna qol jetkizý úshin on transulttyq korporatsııa men «zákirli» ınvestorlar tartýdy qamtamasyz etý kerek, - dedi Qazaqstan Prezıdenti.
Nursultan Nazarbaev tamaq ónerkásibi, qurylys materıaldarynyń óndirisi, mashına jasaý sııaqty sektorlarda otandyq bıznesti damytyp, básekege qabiletti ónim jasaý jáne syrtqy naryqtarǵa shyǵý úshin zor áleýet bar ekenine nazar aýdardy. Osyǵan baılanysty «Báıterek» holdıngine «Atameken» ulttyq kásipkerler palatasymen birlesip «Ulttyq chempıondar» jobasyn júzege asyrý tapsyryldy. Sondaı-aq Memleket basshysy tikeleı elimizben baılanystyrylatyn jáne onyń halyqaralyq arenadaǵy ımıdjine oń yqpal etetin óz brendimizdi ázirleýdiń mańyzdylyǵyn aıtty.
Qazaqstan Prezıdenti yqpaldastyq aıasynda, ásirese Eýrazııalyq ekonomıkalyq odaq aıasynda Reseıdiń, Ortalyq Azııanyń, Qytaıdyń, Úndistan men Irannyń shekara mańyndaǵy naryqtaryna shyǵý úshin meılinshe aýqymdy jumystardy bastaǵan jón ekenin atap ótti.
Budan bólek, Nursultan Nazarbaev DSU-ǵa múshe bolý ekonomıkamyz úshin jańa kókjıekterge jol ashatynyna nazar aýdardy.
- Bir jaǵynan, bul bizdiń kásiporyndardyń sheteldik alyp naryqtarǵa shyǵýyn, ekinshi jaǵynan, tutynýshylardyń kóptegen taýarlar men qyzmetterge qol jetkizýin qamtamasyz etedi. Jańa óndirister men jumys oryndaryn ashýǵa múmkindik alamyz. Bizdiń mindetimiz - Qazaqstan kompanııalarynyń jańa jaǵdaıǵa tezirek beıimdelip, DSU-ǵa kirýden meılinshe paıda tabýǵa kómektesý, - dedi Qazaqstan Prezıdenti.
Memleket basshysy bolashaq urpaq ıgiligi úshin uzaq merzimge jalǵasatyn nátıjelerge baǵyttalǵan «Nurly jol» jańa ekonomıkalyq saıasatynyń aıryqsha mańyzdylyǵyn atap ótti.
- Bizdi el ishinde 7 myń shaqyrym avtojoldar salý jáne jóndeý jumystary kútip tur. Aldaǵy 3 jylda baǵdarlama maqsatyna 20 mıllıard dollardan astam qarajat jumsalady, onyń úshten birinen astamyn halyqaralyq qarjy ınstıtýttary bóledi. Tórt jyl ishinde baǵdarlama ІJÓ ósimin 16 paıyzǵa eseleıdi dep kútilýde. Qorytyndysynda 2019 jylǵa qaraı biz iri qalalar arasyndaǵy jolǵa ketetin ýaqytty úsh ese qysqartyp, eldiń birtutas energetıkalyq júıesin qalyptastyrýdy jáne eń bastysy, búkil ekonomıkamyzdy ortaq naryqqa biriktirýdi kózdep otyrmyz, - dedi Nursultan Nazarbaev.
Qazaqstan Prezıdenti «Nurly jol» baǵdarlamasy ónerkásipti jáne qyzmet kórsetý salasyn jandandyrýǵa da múmkindik beretinin aıtty.
- Bıznesimizge baǵdarlama jobalarynyń júzege asyrylýyna tolyqqandy atsalysýǵa múmkindik berý úshin jergilikti quramdy kúsheıtý qajet. Ol úshin kerekti azyq-túlik, jatyn oryn, tehnıkalyq servıs sııaqty zamanaýı qyzmetterdi damytý óz kezeginde elimiz arqyly ótetin baǵdarlardyń tartymdylyǵy men jaılylyǵyn arttyrady. Budan bólek, biz qazaqstandyqtardyń birneshe býynyna qyzmet etetin joldar salatyn bolamyz. Bul úshin olardyń tek sapaly salynýyna ǵana emes, udaıy qoldaý jáne kútim kórsetilip otyrýyna kóńil bólý kerek. Úkimet búkil elimizdiń jol-kólik ınfraqurylymynyń jaı-kúıi men damýyna jaýap beretin biryńǵaı operator qalyptastyrýdy oılastyrýǵa tıis, - dedi Memleket basshysy.
Nursultan Nazarbaev «Bes ınstıtýtsıonaldyq reformany júzege asyrý jónindegi «100 naqty qadam» - Ult jospary aıasynda qurylys, jer qoınaýyn paıdalaný, energetıka jáne tasymaldaý salalaryndaǵy retteý isi ozyq halyqaralyq tájirıbelerge sáıkestendiriletinin atap ótti.
Sońynda Memleket basshysy júrgizilip jatqan barlyq reformalar elimizdi damyta túsý úshin sapalyq turǵydan jańa jaǵdaılar jasaýǵa baǵyttalyp otyrǵanyn aıtty.
- Otandyq ekonomıkamyzda jekemenshik sektordyń rólin arttyrý jolyndaǵy memlekettiń júıeli qadamynyń biri osy. Bul el azamattarynyń turmysyn jaqsartýǵa da septigin tıgizetin bolady. Búgin biz aıtarlyqtaı nátıjeler bar ekenine kóz jetkizdik. Endigi mindetimiz - el aldyna qoıylǵan mańyzdy mindetterdi iske asyrý, - dedi Nursultan Nazarbaev.
Shara barysynda kún tártibindegi máseleler boıynsha ınvestıtsııalar jáne damý mınıstri Á.Isekeshev, ulttyq ekonomıka mınıstri E.Dosaev, Pavlodar oblysynyń ákimi Q.Bozymbaev, Almaty oblysynyń ákimi A.Batalov baıandama jasady.