N. Nazarbaev: Bilikti maman qaıda bolsa, ekonomıka da sonda barady

ASTANA. 29 qarasha. QazAqparat - Bilikti maman qaıda bolsa, ekonomıka da sonda barady. Búgin Astanada «Bolashaq» halyqaralyq stıpendııasynyń 20 jyldyq mereıtoıyna arnalǵan forým barysynda QR Prezıdenti Nursultan Nazarbaev osylaı aıtty.

«Ǵylymı qamtymdy ekonomıkany tıimdi bilim júıesinsiz elestetý de múmkin emes. Bul baǵytta biz bilim berýdi mektep partasynan bastap ózgertýge umtylyp jatyrmyz. Bundaǵy basty mindet keleshektiń pedagogtaryn daıarlaýda bolyp otyr. Máselen, Fınlıandııada pedagogtardy mektep bitirýshi synyp arasynan iriktep, sol túlekterdiń ishinen eń úzdik oqıtyn 10 paıyzynan ustaz daıarlaıdy. Sıngapýrde muǵalimder jyl saıyn 100 saǵattyq kýrstan ótedi. Japonııada muǵalimder úshin jetilýdiń jiti tásiline tutastaı jyl arnalady», - dedi N. Nazarbaev.

Sonymen qatar, Elbasy dýaldy oqytý júıesine toqtala kele, másele bilikti mamandar týraly bolyp otyrǵanynan nazar aýdartty.

Prezıdenttiń paıymynsha, bilikti maman qaıda bolsa, ekonomıka da sonda barady. «Sondyqtan da, nemistiń dýaldy bilim berý júıesi bizde tolyǵymen qoldanylýy kerek», - dedi Elbasy.

Budan bólek, Memleket basshysy sońǵy jyldary «Bolashaq» baǵdarlamasy boıynsha mamandyqqa oqıtyndardyń 25 paıyzy ǵylym men bilim salasyna tıetinin aıtyp, buny aldaǵy ýaqytta arttyra berý qajettigin de eske saldy. N. Nazarbaev bul baǵytta «bolashaqtyqtar» basym ról atqarýy tıistigin aıtty.