N.Nazarbaev beıbitshilikti nyǵaıtqany úshin mártebeli syılyqqa ıe boldy

ASTANA. QazAqparat - Búgin, QR Tuńǵysh Prezıdenti kúni qarsańynda Serbııa astanasy Belgrad qalasynda jyl saıynǵy «Karıch qory» syılyǵyn tabystaý rásimi ótti. Qazaqstan Respýblıkasynyń Prezıdenti Nursultan Ábishuly Nazarbaev Qazaqstan men Serbııa arasyndaǵy beıbitshilik, yntymaqtastyq jáne dostyqty nyǵaıtý isine qosqan zor úlesi úshin osynaý joǵary nagradaǵa laıyq dep tanyldy. Bul nagrada Qazaqstannyń Serbııadaǵy Elshisi qyzmetin qosa atqaratyn Nurbah Rústemovke tabys etildi.

Bul týraly QR SІM baspasóz qyzmeti habarlady.

«Karıch qory» N.Nazarbaevtyń búkil álem aldyndaǵy Semeı ıadrolyq polıgonyn jabý jáne KSRO-dan mura bolyp qalǵan ıadrolyq qarýdan bas tartýdaǵy Álemdik jáne dástúrli dinder kóshbasshylary sezin ótkizý arqyly konfessııaaralyq beıbitshilikti ilgeriletýdegi aıryqsha eńbegin erekshe atap ótken. Serbııada Qazaqstan Prezıdenti eki qurlyqtyń basyn qosatyn mańyzdy ekonomıkalyq birlestik Eýrazııalyq ekonomıkalyq odaqtyń negizin qalaýshy sanalady.

Osydan 18 jyl buryn aǵaıyndy Karıchter negizin qalaǵan «Karıch qory» syılyǵy beıbitshilikti, halyqtar arasyndaǵy yntymaqtastyq pen dostyqty nyǵaıtqany úshin; mádenıet pen óner; ekonomıka men sharýashylyq qyzmet; jýrnalıstıka, pýblıtsıstıka jáne baspa isi; ǵylymı-zertteý jumystary jáne gýmanıtarlyq qyzmet atalymdary boıynsha tabys etiledi.

Syılyq laýreattary arasynda Vladımır Pýtın, Jores Alferov, Evgenıı Prımakov, ıÝrıı Osıpov, Emır Kýstýrıtsa, Novak Djokovıch, Jan-Krıstof Býıson syndy álemge esimi tanymal tulǵalar bar.