Mıýnhende dúnıejúzi qazaqtarynyń kishi quryltaıy ótedi
Іs-sharanyń negizgi maqsaty - mádenı-gýmanıtarlyq jáne áleýmettik-ekonomıkalyq jobalar negizinde qazaq dıasporasynyń ókilderin biriktirý.
Kishi quryltaıdyń jumysyna qazaq dıasporasynyń 100-den astam ókili, sondaı-aq, Qazaqstannyń mádenıet qaıratkerleri, kásipkerler, Dúnıejúzi qazaqtary qaýymdastyǵynyń ókilderi, «Otandastar» qorynyń mamandary men sarapshylary qatysady.
Kishi quryltaıdaǵy negizgi taqyryp Qazaqstan Respýblıkasynyń Tuńǵysh Prezıdenti - Elbasynyń «Uly dalanyń jeti qyry» maqalasy men «Rýhanı Jańǵyrý» baǵdarlamasynyń erejeleri kontekstinde yntymaqtastyqty damytý bolyp tabylady. Shara ıasynda álemniń túrli elderindegi qazaq dıasporasynyń yntymaqtastyǵyn damytýdyń ózekti máselelerin talqylaý, «Otandastar» qory men Dúnıejúzi qazaqtary qaýymdastyǵy bastamashylyq etken birlesken baǵdarlamalar men jobalardy júzege asyrý josparlanýda.
Kún tártibinde shetelde turatyn otandastardy qoldaý úshin normatıvtik bazany jetildirý, bilim, týrıstik baǵdarlamalaryn iske asyrý, qazaq tilin damytý, baılanys ornatý jáne bıznes-jobalardy júzege asyrý sekildi máseleler talqylanatyn bollady.
Quryltaıdyń spıkerleri Qazaqstannyń Germanııadaǵy Elshisi Bolat Núsipov, Dúnıejúzi qazaqtary qaýymdastyǵy tóraǵasynyń birinshi orynbasary Zaýytbek Turysbekov, «Halyqaralyq baǵdarlamalar ortalyǵy» AQ prezıdenti Janbolat Meldeshov, «Otandastar» qorynyń vıtse-prezıdenti Maǵaýııa Sarbasov, Shvetsııadaǵy Qazaqtar qaýymdastyǵynyń tóraǵasy Murat Ermısh bolady.
Quryltaı qorytyndysy boıynsha Shvetsııada, Ulybrıtanııada, Germanııada, Frantsııada, Danııada, Nıderlandyda, Avstrııada jáne Belgııada jumys isteıtin qazaq mádenı ortalyqtarymen «Otandastar» qorynyń yntymaqtastyǵy jáne áriptestigin damytý týraly eki jaqty memorandýmǵa qol qoıylmaq.
Budan bólek, quryltaı sheńberinde «Qazaq úıi» - ortaq brendimen álemniń túrli elderinde jumys isteıtin barlyq qazaq mádenıet ortalyqtarynyń biryńǵaı bazasyna biriktirýge baǵyttalǵan joba bastalmaq.
Sondaı-aq, quryltaı sheńberinde qazaqstandyq delegatsııa sheteldegi qazaq dıasporasy ókilderiniń arasyndaǵy jastarmen kezdesip, qazaqstandyq joǵary oqý oryndarynyń bilim berý kórmesin ótkizedi. Kórme jumysyna Nazarbaev ýnıversıtetiniń, Súleımen Demırel atyndaǵy ýnıversıtettiń jáne Semeı qalasynyń Shákárim atyndaǵy memlekettik ýnıversıtetiniń ókilderi qatysady. Kórme aıasynda Qazaqstannyń joǵary oqý oryndarynda oqý múmkindikteri tanystyrylady jáne sheteldik ýnıversıtettermen yntymaqtastyq jobalary usynylady.
Sonymen qatar, quryltaı aıasynda alǵash ret otandyq jáne sheteldik kásipkerlerdiń qatysýymen bıznes-forým ótedi. Bıznes-forým shaǵyn jáne orta kásipkerlikti damytýdyń túrli salalarynda tájirıbe almasýǵa, Qazaqstan, Germanııa jáne Eýropa men Azııanyń basqa da elderiniń kásipkerleri arasyndaǵy baılanystardy keńeıtýge múmkindik beredi.
Tutastaı alǵanda Qazaqtardyń kishi quryltaıyn ótkizý jańa seriktesterdi izdeý, iskerlik jáne gýmanıtarlyq baılanystar ornatý, sheteldik qoǵamdastyqqa Qazaqstan Respýblıkasynyń túrli salalaryndaǵy múmkindikterin kórsetý úshin tıimdi alańdy qamtamasyz etedi.