Mıýnhen konferentsııasynda Ortalyq Azııadaǵy protsesterge erekshe nazar aýdaryldy – Erlan Qarın

MıÝNHEN. QazAqparat – Álemdik sarapshylardyń Ortalyq Azııadaǵy protsesterge degen qyzyǵýshylyǵy artty. Bul týraly Mıýnhen qaýipsizdik konferentsııasynyń aıasynda tilshilerge QR Prezıdentiniń keńesshisi Erlan Qarın málim etti, dep habarlaıdy QazAqparat tilshisi.

«Mıýnhen qaýipsizdik konferentsııasynda alǵash ret Qazaqstan basshysy qatysyp otyr. Sonymen qatar, birinshe ret Ortalyq Azııaǵa arnalǵan arnaıy paneldik pikirtalas uıymdastyryldy. Bul álemdik sarapshylar tarapynan Ortalyq Azııadaǵy, onyń ishinde Qazaqstanda bolyp jatqan protsesterge qyzyǵýshylyq artqanyn baıqatty. Ekinshiden, búgingi paneldik sessııada sarapshylar men jýrnalısterdiń kóp qatysýy qazirgi ýaqytta Qazaqstannyń aımaqtyq jáne halyqaralyq protsesterde alatyn erekshe ornyn kórsetip otyr», - dedi E. Qarın Mıýhen konferentsııasynda Memleket basshysy Qasym-Jomart Toqaev qatysqan otyrystan keıin.

Sonymen qatar ol búginde Qazaqstan barlyq ári memlekettermen qarym-qatynasty ornata alǵan memleket ekenin atap ótti.

«Ózderińiz baıqasańyzdar, búgin Qazaqstan Prezıdentine qoıylǵan suraqtar túrli taqyryptardy qamtydy. Osy oraıda aımaqtyq qaýipsizdik, Sırııa men Aýǵanstandaǵy qazirgi jaǵdaı, Ortalyq Azııanyń saıası-ekonomıkalyq damýy, alpaýyt eldermen qarym-qatynas, sondaı-aq koronavırýsqa qatysty suraqtar qoıyldy. Sebebi, búginde jalpy halyqaralyq jaǵdaı AQSh, Reseı men Qytaı sekildi alyp memleketter arasyndaǵy qarym-qatynasqa baılanysty. Dál osy jaǵdaıda Qazaqstan atalǵan alyp memlekettermen tıisti qarym-qatynasty ornata bildi. Sondyqtan Qazaqstanǵa qatysty suraqtar búgingi paneldik sessııada qoıyldy», - dedi Erlan Qarın.

Budan buryn habarlanǵandaı, Memleket basshysy Qasym-Jomart Toqaev Mıýnhen qaýipsizdik konferentsııasy aıasynda «Geografııalyq ornalasýdyń mańyzy: Ortalyq Azııadaǵy qazirgi jaǵdaı» taqyrybyndaǵy pikirtalasqa qatysty.