Mysyrlyq jazýshy qazaq qyzy týraly jańa romanyn tanystyrdy

ASTANA. QazAqparat - Astanada ótip jatqan «Zamanaýı álemdegi oqý mádenıeti» ІІІ halyqaralyq kongresinde Mysyr jazýshysy Magdı Halım qazaq qyzy týraly jańa romanyn tanystyrdy, dep habarlaıdy QazAqparat tilshisi.

«Mońǵol qyzy» dep atalatyn jańa roman Balqash mańynda týyp-ósip, Amerıkaǵa oqýǵa attanǵan qazaq qyzy týraly áńgimeleıdi.

«Keıipkerdiń bet-pishinine baılanysty, jańa ortadaǵy dostary ony «mońǵol» dep atap ketedi. Ol óziniń qazaq ekenin, óz eliniń tarıhy men mádenıetin nasıhattaıdy jáne tabıǵatty qorǵaý boıynsha bastamalar kóteredi. Dostaryn Qazaqstanǵa ákelip, otbasymen tanystyrady. Roman sońynda qazaq qyzy BUU minberinde sóz sóılep, oıǵa alǵan maqsattaryna jetedi», - dep qysqasha túsindirdi jazýshy jýrnalısterge bergen suhbatynda.

   Jazýshynyń aıtýynsha, kitap bir aı buryn myń tırajben arab tilinde jaryq kórdi. Búgingi Kongreste ol Ulttyq akademııalyq kitaphanaǵa kitaptyń 10 danasyn tartý etpek.

«Kitapty ózge tilderge aýdarý, roman jelisimen kartına men mýltfılmder túsirý quqyǵyn kitaphanaǵa beremin. Men Qazaqstan týraly kóp oqydym, keı qazaqtardan da artyq bilemin dep aıtsam, artyq emes. Qazaq dalasyna sheksiz ǵashyqpyn», - dep aǵynan jaryldy jazýshy.

Sonymen birge, Magdı Halım Qazaqstan týraly ekinshi kitabyn ázirlep jatqanyn jetkizdi. Ekinshi jınaq ótken ǵasyrdaǵy qýǵyn-súrin qurbandary jazalanǵan GÝLAG taqyrybyna arnalǵan.

«GÝLAG taqyrybyn jarty jyl boıy zerttep, arhıvtik qujattarmen jumys istedim. Onyń tarıhyn jańa nusqada kórsetkim keledi. Roman jelisi úsh adamnyń hıkaıasy boıynsha órbip otyrady. Negizgi keıipkerleriniń ázirge qupııa bolǵanyn qalaımyn. Búgingi sharadan soń, GÝLAG ornyndaǵy mýzeıge mindetti túrde baramyn. Mýzeıden alǵan áserimmen kitapty tolyq aıaqtaımyn», - dedi M. Halım.