Mysyrda taraǵan beımálim aýrý Denge bezgegi bolýy múmkin

ASTANA. QazAqparat - 2023 jylǵy 16 shildede buqaralyq aqparat quraldarynda jarııalanǵan Mysyrdyń Densaýlyq saqtaý jáne el turǵyndary mınıstrliginiń aqparaty boıynsha, elde belgileri denge bezgegine uqsas belgisiz aýrýdyń jaǵdaılary tirkelgen.

Bul týraly QazAqparat QR QR DSM Sanıtarııalyq-epıdemıologııalyq baqylaý komıtetiniń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, denge bezgegi – adamǵa ınfektsııa juqtyrǵan masalardyń shaǵýy arqyly beriletin vırýstyq ınfektsııa. Aýrý adamnan adamǵa aýa tamshylary arqyly berilmeıdi.

Aýrý tropıkalyq jáne sýbtropıkalyq elderde taralady.

DDU málimetteri boıynsha, Afrıka, Amerıka, Shyǵys Jerorta teńizi, Ońtústik-Shyǵys Azııa jáne Batys Tynyq muhıtynyń 100-den astam eli endemıkalyq bolyp keledi.

Qazaqstanda jyl saıyn aýrýdyń jekelegen jaǵdaılary tirkeledi. Bıyl denge bezgegi boıynsha qolaısyz elderden (Taıland) kelgen adamdar arasynda onyń 2 jaǵdaıy tirkeldi.

Aýrý dene temperatýrasynyń joǵarylaýy, bas aýrýy, deneniń aýyrýy, júrek aınýy túrinde kórinedi, áıtse de kóp jaǵdaıda aýrý sımptomsyz ótedi jáne naýqastyń jaǵdaıy 1-2 aptadan keıin jaqsarady.

Elge kirgen kezde áýejaıda, temirjol vokzaldarynda jáne avtomobıl pýnktterinde sanıtarııalyq-karantındik pýnktte naýqastardy ýaqtyly anyqtaý jáne medıtsınalyq kómek kórsetý maqsatynda dene temperatýrasyn qashyqtyqtan ólsheý arqyly kelgenderge monıtorıng júrgiziledi.

Endemııalyq elderde bolǵan kezde ınfektsııany juqtyrmaý úshin:

- masalardyń shaǵýyna qarsy quraldardy qoldanyńyz;

- terezeler men esikterdi jabyńyz;

- aýrýdyń belgileri paıda bolǵan kezde medıtsınalyq kómekke júginińiz.

Osyǵan deıin Mysyrda bir aýyldyń júzdegen turǵyny beımálim dertti juqtyrǵany týraly habarlandy.