Mysyrda qonaqúıde reseılik 40 týrıst ýlanyp qaldy

KAIR. TASS – QazAqparat – Qyzyl teńizdegi Hýrgada kýrorttyq qalasynyń tórt juldyzdy qonaq úıinde ýlanǵan reseılikterdiń sany 40 adamǵa jetti. Prokýratýranyń ókimimen qonaqúı sanıtarlyq qaýipsizdik normalaryn buzǵany úshin belgisiz merzimge jabyldy, barlyq týrıst basqa qonaq úılerge ornalastyryldy, dep habarlaıdy QazAqparat TASS agenttigine silteme jasap.

Bul týraly agenttikke jeksenbi kúni Mysyrdyń Týrıstik palatalar federatsııasy málim etti.

«aýrýhanaǵa 40 adam júgindi, qazirgi ýaqytta tórteýi aýrýhanadan shyqty, 36 adam em qabyldaýda», - dedi federatsııa ókili.

Ol barlyq naýqastyń jaǵdaıy birqalypty, turaqty ekenin, ómirine esh qaýip joq ekenin atap ótti. Dárigerler olardy dúısenbi kúni shyǵarady.

Reseı Federatsııasynyń Hýrgadadaǵy bas konsýly Vıktor Voropaev jeksenbide TASS-qa jergilikti sanıtarlyq bılik ókilderi Hýrgadada ornalasqan AMC Royal hotel qonaqúıin 48 saǵatqa jabý týraly sheshim qabyldaǵanyn aıtty.

Aıta keteıik, atalǵan qonaqúıdiń qonaqtary ýlanyp aýrýhanaǵa túsken.

«Týrısterdi basqa qonaq úılerge ornalastyrady. Bas konsýldyq jaǵdaıdy qadaǵalap otyr», - dedi ol. Dıplomattar qonaqúıde tek reseılikter ǵana ýlanǵan ba, joq pa, sony anyqtaıdy.

Alaıda, keıinirek prokýratýranyń ókimimen qonaqúı sanıtarlyq qaýipsizdik normalaryn buzǵany úshin belgisiz merzimge jabylǵany belgili boldy jáne jaqyn arada ashylýy ekitalaı.

«Prokýratýra AMC Royal hotel qonaq úıinde tergeýdi bastady, ol «At-Taıarın» qonaqúıi retinde de belgili. Azyq-túlik, sýsyndar men kórsetiletin qyzmetterge qatysty sanıtarlyq qaýipsizdik talaptaryn saqtamaǵany úshin qonaqúıge iri kólemdegi qarjylyq aıyppuldar ǵana emes, lıtsenzııany qaıtaryp alyp, tolyq jabylý qaýpi tónip tur», - dep túsindirdi Týrıstik palatalar federatsııasy.