Mysyrda Qazaqstannyń ınvestıtsııalyq múmkindikteri tanystyryldy

KAIR. QazAqparat - Qazaqstannyń Mysyrdaǵy Elshiliginde 50-den astam mysyrlyq ınvestor men iri kompanııa jetekshileriniń qatysýymen elimizdiń ınvestıtsııalyq múmkindikterine arnalǵan shara ótti. Bul týraly QR Syrtqy ister mınıstrliginen málim etti, dep habarlaıdy QazAqparat.

Elshi Arman Isaǵalıev Mysyr Qazaqstannyń Afrıka qurlyǵynda iri saýda-ekonomıkalyq áriptesi ekenin jáne sońǵy jyldary bul baǵytta ekijaqty qatynastar jandana túskenin atap ótti.

«Qazaqstan dıplomaty qatysýshylardy Qazaqstannyń áleýmettik-ekonomıkalyq damýynyń negizgi baǵyttarymen, elimizdiń álemdegi damyǵan 30 memlekettiń qataryna enýi boıynsha QR Úkimetiniń qabyldap jatqan sharalarymen, ınvestıtsııalyq múmkindiktermen, sheteldik ınvestorlarǵa edáýir jeńildikter beretin zańnamalarmen, sondaı-aq arnaıy ekonomıkalyq aımaqtardyń jumysymen tanystyrdy.

Sonymen qatar, áleýetti ınvestorlarǵa 2018 jylǵy jeltoqsanda sheteldik ınvestıtsııalar tartý mindeti Syrtqy ister mınıstrligine júktelgeni týraly habarlandy. Investormen jáne jobamen tıimdi jumys isteýge múmkindik jasaıtyn Elshilik - SІM - Qazaqstannyń óńiri formatynda úshdeńgeıli júıe qalyptastyrylǵany aıtyldy. Osyndaı jumys tetigi jańa jobalar men ınvestorlardy ashýǵa múmkindik berip, jobany bastaý jáne iske asyrý arasyndaǵy joldy qysqartady», - delingen mınıstrlik habarlamasynda.

Buǵan qosa, ınvestorlardy ıdeıadan jobany iske asyrýǵa deıin súıemeldep júretin «Kazakh Invest» ulttyq kompanııasynyń bul baǵyttaǵy mańyzdy róli basa aıtyldy. «Astana» Halyqaralyq qarjy ortalyǵy óziniń tıisti qarjy quraldary men halyqaralyq deńgeıdegi qyzmetteri arqyly alań usynatyny da baıandaldy.

Qazaqstan-Mysyr Іskerlik keńesiniń múshesi, Los Amigos G.T.C. kompanııasynyń basshysy Galıal Gor óziniń jeke tájirıbesine súıenip, mysyrlyq ınvestorlarǵa Qazaqstanda bıznes jasaýdyń tartymdylyǵy, ınvestorlarǵa beriletin artyqshylyqtar men jeńildikter týraly aıtyp berdi. Ol elimizde qazirgi kezde nátıjeli jumys istep jatqan mysyrlyq kompanııalar týraly da maǵlumat berdi.

Іs-shara barysynda Qazaqstan, Kazakh Invest jáne AHQO jumysy týraly beınerolıkter kórsetildi. Sonymen qatar, qonaqtarǵa ımıdjdik kitapshalar, baıandamalar, ınvestıtsııalar salasyndaǵy zańnamalar, elimizde sheteldik kompanııalardy tirkeý týraly qajetti aqparat úlestirildi.

«Qazaqstannyń ınvestıtsııalyq múmkindikteri mysyrlyq ınvestorlar arasynda úlken qyzyǵýshylyq týdyrdy. Bıznesmender elimizdegi turmys deńgeıi, ortasha aılyq, energııa jáne sý tarıfteri týraly suraqtar qoıdy. Birneshe kompanııa basshylary jaqyn arada Qazaqstanǵa saparmen baryp, ınvestıtsııa salasynda kelissózder júrgizýge nıet bildirdi», - dedi vedomstvodan.