Mysyr elshisi Astanadaǵy mamandandyrylǵan HQO-da júrgizýshi kýáligin aýystyrdy

ASTANA. QazAqparat - Mysyr Arab Respýblıkasynyń Qazaqstandaǵy elshisi elordadaǵy mamandandyrylǵan Halyqqa qyzmet kórsetý ortalyǵynda júrgizýshi kýáligin aýystyrdy. Bul týraly «Azamattarǵa arnalǵan úkimet» memlekettik korporatsııasynyń qoǵammen baılanys departamentiniń dırektory Murat Jumanbaı Feısbýktegi óz paraqshasynda jazdy, dep habarlaıdy QazAqparat tilshisi.

«Búgin Mysyrdyń Qazaqstandaǵy elshisi Kamel Ibrahım Haısam Salah memlekettik qyzmettiń kórsetilý sapasyn baıqap kórý úshin elordadaǵy mamandandyrylǵan HQO-ǵa kelip, júrgizýshi kýáligin aýystyrdy. Óziniń eń alǵashqy júrgizýshi kýáligin elshi Qazaqstanda ári mamandandyrylǵan HQO-lar joq kezde resimdegen bolatyn. Búgin ony aýystyrý kezinde servıstiń kórsetilýi men ýaqytyna tańǵalyp qaıtty», - dep jazady Murat Jumanbaı.

Onyń jazýynsha, jarty saǵat óter-ótpesten memlekettik korporatsııanyń qyzmetkerleri mysyrlyq elshiniń qolyna jańa qujatyn ustatqan. Óz kezeginde elshi sapaly ári sypaıylyqpen kórsetilgen qyzmet úshin alǵysyn bildirdi.