Mysyr Beıbarys sultan meshitin qalpyna keltirýge aqsha bóledi

ASTANA. QazAqparat - Kaırdegi Beıbarys sultan meshitin qalpyna keltirý jumystary qaıta bastalady. Bul týraly búgin QR Syrtqy ister mınıstrliginde ótken brıfıngte Qazaqstanyń Mysyrdaǵy Tótenshe jáne Ókiletti Elshisi Arman Isaǵalıev aıtty, dep habarlaıdy QazAqparat tilshisi.

«Qazaq pen Mysyr halyqtary arasyndaǵy baılanystardyń tereń tarıhı tamyry bar. Qazaq jerinen shyqqan Beıbarys sultan babamyzdyń tulǵasy eki eldiń arasyndaǵy dostyq, mádenı jáne tarıhı  baılanystyń sımvolyna aınaldy. Kaır qalasynda Beıbarys sultannyń úlken meshiti bar.  Ol Mysyrdaǵy kólemi boıynsha ekinshi meshit sanalady. 2007 jyly eki eldiń arasynda atalǵan meshitti qalpyna keltirý týraly úkimetaralyq kelisimge qol qoıylǵan bolatyn», - dedi Elshisi.

Onyń aıtýynsha, joba quny 12 mıllıon dollarǵa baǵalanǵan.  Onyń 4,5 mıllıon dollaryn Qazaqstan tarapy, al qalǵanyn Mysyrdyń óteýi týraly ýaǵdalastyqqa qol jetkizilgen.  Osy kúnge deıin Qazaqstan tarapy óz ýádesin oryndap, 4,5  mln dollar bólgen. Atalǵan qarjy meshitti qalpyna keltirýdiń birinshi kezeńine jumsalǵan. Alaıda, Mysyr tarapy osy ýaqytqa deıin óz ýaǵdalastyǵyn oryndaı almaı keldi. Oǵan eldegi saıası tolqýlar, eki tóńkeris, ekonomıkadaǵy úlken daǵdarys sebep boldy.

«Qazirgi kezde týrısterdiń artýyna jáne odan bıýdjetke túsetin qarajat kóleminiń ulǵaıýyna baılanysty bul másele qaıta kóterildi. Mysyr Premer-Mınıstriniń jeke aralasýymen bas merdiger men Kóne eskertkishter mınıstrligi arasyndaǵy kelispeýshilik sheshildi. Sondyqtan jaqyn arada, osy kúnderi meshitti qalpyna keltirý jobasy qaıtadan bastalady. Mınıstrdiń maǵan bergen ýádesine sáıkes, meshitti qalpyna keltirý júmystarynyń bastalýynan aıaqtalýyna deıin 12 aı ketedi. ıAǵnı, sol 12 aıdyń ishinde jumystar tolyq aıaqtalady dep senemin», - dedi Arman Isaǵalıev.