Myrzataı Joldasbekov «Astana» velokomandasynyń keńesshisi qyzmetine surandy

ASTANA. QazAqparat - Búgin QR Mádenıet jáne sport mınıstri Arystanbek Muxamedıuly qoǵamdyq keńes aldyndaǵy esep berdi. Sol jerde keńes tóraǵasy Myrzataı Joldasbekov «Astana» velokomandasynyń menedjmentin synǵa aldy, dep habarlaıdy QazAqparat tilshisi.

«Ultymyzdy, memleketimizdi nasıxattaıtyn «Astana» velokomandasy sııaqty mańyzdy jobalar bar. Alaıda keıingi kezde velokomanda tómendep ketti. Nıbalı ketip qaldy, anaý ketti, mynaý ketti. Arý anaý, birdeńesi shyǵyp qalady, birdeńesi synady. Ótkende Skarponı beısharany qaǵyp ketti. Baby jaqsy edi...», - degende Joldasbekovti mınıstr Muxamedıuly bólip jiberdi. «Sol komandany sizge beremiz-aý. Velosportty jaqsy biledi ekensiz», - dep ázildedi ol.

Alaıda Myrzataı Joldasbekov óz sózin jalǵastyryp: «Tasta, eń bolmasa, meni soǵan keńesshi etip qoısańdarshy. Men kórip otyramyn ǵoı. Qap, áttegen-aı, myna ıttiń balasy nege ozdy, saqtaı otyra turý kerek edi deımin ǵoı. Sosyn Mıkele (Landa - avt.) sııaqty jaqsy balalar bar edi. Bári Sky-ǵa ketip qaldy. Sol balalardy jibermeý kerek. Aqsha tólep úıretemiz, artynan aıyrylyp qalamyz. Negizi, men «Astanany» qalt jibermeı, qarap otyramyn. Óıtkeni (ony - avt.) mıllıardtaǵan xalyq kóredi», - dep atap ótti.

Aıta keteıik, qoǵamdyq keńes kezinde mınıstr Muxamedıuly árbir oblys ózine tán sport túrin damytatynyn jetkizdi. Sondaı-aq ol «Lotereıa týraly» jańa zań kómegimen jastardyń barlyǵyn býkmekerlik keńselerden shyǵarýdy josparlap otyr.