Myrzaǵalıev sý resýrstaryn basqarý baǵdarlamasynyń 10 baǵytyn atady
«Sý salasynyń ózekti máseleleri retinde kelesi jaıttardy aıtýǵa bolady. Olar: eskirgen ınfraqurylym jáne sonyń saldarynan bolatyn sýdyń ysyrapsyz paıdalanýy; sapaly sýdyń tapshylyǵy; tarıf esepteýde qoldanatyn tetiktiń álsizdigi; bilikti kadrlardyń jetispeýshiligi; kórshiles memlekettermen sý bólý máseleleri. Joǵaryda atalǵan problemalardy sheshý úshin Qazaqstannyń sý resýrstaryn basqarýdyń 2020-2030 jyldarǵa arnalǵan baǵdarlamasyn ázirleý qajet. Osy másele boıynsha Elbasy men Memleket basshysynyń tıisti tapsyrmalary bar», - dedi mınıstr.
Onyń aıtýynsha, baǵdarlama jobasynyń maqsaty – halyqtyń turmys-tirshiligi men eldiń ekonomıkasyna jetkilikti sý kólemimen qamtamasyz etý, sý salasyndaǵy ekologııalyq tepe-teńdikti saqtaý.
«Biz baǵdarlamanyń negizgi 10 baǵytyn anyqtadyq. Birinshi - halyqaralyq yntymaqtastyq. Kórshiles elderden keletin negizgi sý kózderi Jaıyq, Ertis, Іle, Syrdarııa, Shý jáne Talas ózenderi bolyp tabylǵandyqtan, kelesideı sharalardy iske asyrý qajet dep esepteımiz: shekaralas eldermen sý-energetıkalyq yntymaqtastyq tetigin jetildirý; kelissózder ustanymyn kúsheıtý maqsatynda kásibı kelissózder toptaryn qalyptastyrý. Ekinshi - quqyqtyq bazany jańǵyrtý. Osy baǵyt aıasynda sý qaýipsizdik strategııasy men zań jobalaryn ázirleý, sý resýrstar komıtetine salalyq tarıftik retteýshi fýnktsııasyn berý, jáne Birikken Ulttar Uıymynyń turaqty damý maqsattarymen sý resýrstar baǵdarlamasyn úılestirý usynylady», - dedi ol.
Mınıstrdiń aıtýynsha, úshinshi - ınstıtýtsıonaldyq reformalaý. Investıtsııalyq jobalardy tıimdi iske asyrý maqsatynda «Qazsýshar» respýblıkalyq memlekettik kásiporny AQ retinde jasaqtalady. Gıdrotehnıkalyq qurylymdardyń tehnıkalyq jaı-kúıine baqylaý men qadaǵalaýdy qamtamasyz etý úshin eki ortalyq qurý kózdelgen. Tórtinshi - sý sharýashylyǵy ınfraqurylymyn jetildirý jáne qaıta jańǵyrtý. Bul rette qoldanystaǵy respýblıkalyq menshiktegi 182, al kommýnaldyq menshiktegi 300 gıdrotehnıkalyq qurylymdardyń qaýipsiz paıdalanylýyn qamtamasyz etý úshin olardy qaıta jańǵyrtý kajet. Jańa 26 gıdrotehnıkalyq qurylymdardy salý eldiń ekonomıkasy úshin qosymsha jerústi sý qorlaryn jınaqtaýǵa múmkindik beredi.
«Besinshi - sý naryǵyn qurý boıynsha ozyq halyqaralyq tájirıbeni zertteý. Kóptegen memleketter sýmen jabdyqtaý, sý sharýashylyǵy ınfraqurylymyn salýdy qarjylandyrý sııaqty birqatar máselelerdi sý naryǵynyń tetikterin engizý arqyly sheship otyr. Mysaly, Avstralııa, Frantsııa syndy memleketterde bul tájirıbe oń nátıje kórsetti. Osy tájirıbeni qoldaný bizge de múmkin bolyp otyr. Altynshy - tsıfrlandyrý, «Smart Water» jobasy, sýdy únemdeý. Sý sharýashylyǵyn tsıfrlandyrý, «Smart Water» jobasy men avtomattandyrylǵan geoaqparattyq júıeni engizý arqyly biz sýdy únemdeý saıasatyn júrgizip, paıdalaný shyǵyndaryn tómendetip jáne tutynylatyn sýdyń sapasy men mólsherin naqty esepteı alamyz«, - dedi ol.
Maǵzum Myrzaǵalıevtiń atap ótýinshe, jetinshi baǵyt - sý resýrstaryn ekologııalyq turǵydan ońtaıly paıdalaný. Bul úshin zamanaýı tehnologııalar negizinde sýdy únemdeýdiń jan-jaqty saıasatyn engizý, sý máselesine azamattyq qoǵam men bıznestiń qatysýy men habardar bolýy, tasqyn sýdy basqarý júıesin qurý sekildi qadamdar jasalýy qajet. Segizinshi baǵyt - sý salasynyń mamandaryn daıarlaý jáne ǵylymı tájirıbıeni súıemeldeý. Osy baǵyt boıynsha elimizdiń joǵary oqý oryndaryndaǵy bilim berý standarttaryn qaıta qaraýdy, sý sektorynyń mamandaryn daıarlaıtyn profıldi joǵary oqý ornyn qurý, álemniń ozyq oqý oryndaryna halyqaralyq granttar bólý, ǵylym jaǵynan qamtamasyz etý usynylady.
»Toǵyzynshy - memlekettik-jekemenshik áriptestikti damytý. Sý salasyndaǵy ınfraqurylymnyń ınvestıtsıalyq tartymdylyǵyn arttyrý, sý sharýashylyǵy nysandaryn salý, qaıta jańǵyrtý jáne jetildirý jumysyna memlekettik-jekemenshik áriptestik tetikterin jan-jaqty engizý kerek. Onynshy - elimizdegi sý tapshylyǵy bar aýmaqtarǵa basqa óńirlerden sýdy tartý úshin ulttyq mańyzdy sý jobalaryn iske asyrý múmkindigin zertteý qajet«, - dedi mınıstr.