Myrzaǵalı Aıtjanov: Ózge eldiń sportshylary Qaırat Eralıevke qııanat jasalǵanyn aıtty

ASTANA. QazAqparat - Bokstan Qazaqstan ulttyq quramasynyń bas bapkeri Indonezııada ótip jatqan Azıada aıasyndaǵy jekpe-jekter týraly óz oıymen bólisip, QazAqparat tilshisine shaǵyn suhbat berdi.

- Myrzaǵalı Qulanuly, Azııa oıyndaryndaǵy boksshylaryńyzdyń aıaqalysy qalaı?

- Men ózim baptaıtyn erler quramasynan jeti boksshyǵa úmit artyp, Jakartaǵa alyp keldim. Sol jeteýdiń altaýy jarys jolynda. Keshe, bir boksshymyz Qaırat Eralıev qana jarys jolynan shyǵyp qaldy. Qalǵan alty boksshy shırek fınalǵa ótti. Ony ózderińiz de baıqap, kórip otyrǵan bolarsyzdar.

- Qaırat qaı jerde múlt ketti?

- Men óz shákirtimniń jekpe-jegine kóńilim toldy. Ol keshe jaman judyryqtasqan joq. Barynsha el namysyn abyroımen qorǵaýǵa tyrysty. Qarsylasynan úsh raýnd boıy basym boldy. Ókinishke qaraı, tóreshiler sheshimi basqasha boldy. Artynan osynda júrgen áriptesterimiz Qaıratqa qııanat jasalǵanyn aıtyp jatty. Qytaı, japon sportshylary da, bapkerleri de bizge Qaırattyń qarsylasynyń jeńisine kúmánmen qaraǵanyn aıtty. Biraq, ol da osal boksshy emes, álem chempıonatynyń qola júldegeri, Azııa chempıonatynyń jeńimpazy. Olımpıada oıyndarynda óner kórsetip júrgen boksshy. Kezinde Serik Sápıevke, Baqtııar Artaevqa da osyndaı qysymdar jasalǵan bolatyn. Biraq, olar sol tóreshilerdiń qııanatynan qırap qulap ketken joq. Artynan talaı bıikterdi baǵyndyrdy. Olımpıada chempıony boldy. Sondyqtan, bir sátsizdikke bola biz moıynsunaıyq dep turǵan joqpyz. Qaırat áli otyzǵa da tolǵan joq. Alar asýy áli alda dep senemin. Bizde Olımpıada, álem chempıondary sanaýly ǵana. Sol sanaýly boksshylardyń biri osy - Qaırat Eralıev.

- Ózge jigitterimizdiń jekpe-jegine qalaı baǵa beresiz?

- Barlyq boksshylar óte jaqsy daıyndyqpen keldi. Alǵashqy jekpe-jekterin jeńispen bastap, shırek fınalǵa shyqty. Endi, bir-eki qadamyn sátti ótse, ary qaraı medalǵa da qol jetkizemiz. Sol úshin qalǵan boksshylardyń daıyndyǵymen jumysymyzdy jalǵastyryp jatyrmyz.

- Buıyrsa neshe altyn alamyz dep josparlap otyrsyzdar?

- Osyǵan deıin josparymyzdy aıtqan bolatynmyn. Bul - Azııa oıyndary, «Saryqurlyqtyń» kil myqtylary jınalǵan doda. Sondyqtan osal qarsylastar joq. Buıyrtqanyn alamyz. Ýaqytynda kóre jatarsyzdar...

- Áńgimeńizge rahmet!