Myńnan asa memlekettik qyzmetshi joǵary laýazymdarǵa taǵaıyndaldy
«Memlekettik qyzmetshilerdiń keshendi attestatsııasyn júrgizý «100 naqty qadam» Ult jospary aıasynda eskerilgen jáne bul sharalar halyqqa qyzmet etý ustanymdary boıynsha Memleket basshysy belgilep bergen maqsatqa yqpal etedi. Alǵash ret atalǵan attestatsııa aýqymdy túrde ótkizilip, «B» korpýsyndaǵy barlyq qyzmetshilerdi qamtydy. Jalpy, 2017 jyly attestatsııadan 66 853 memlekettik qyzmetshi ótti», - delingen QR Memlekettik qyzmet isteri jáne sybaılas jemqorlyqqa qarsy is-qımyl agenttigi habarlamasynda.
Atap aıtqanda, jeke quzyrettiligine jasalǵan baǵalaý barysynda qyzmetshiniń zańnama aıasynda memleket men qoǵamǵa qyzmet etýdegi adaldyǵy, etıkasy jáne ózge de qasıetteri nazarda boldy.
Testileý nátıjesinde ortalyq memlekettik organdardyń joǵary basqarýshy býyny qyzmetshileriniń arasynda «sheshim qabyldaý» men «qyzmetti tutynýshyǵa baǵdarlaný» quzyrettilikteri damyǵandyǵy kóringen. Al jergilikti atqarýshy organdary basqarýshylarynda «sabyrlyq» pen «qyzmetti tutynýshylardy aqparattandyrý» quzyretteri aıqyn baıqalady.
Sonymen qatar ary qaraı damýdy qajet etetin qyzmettik ókilettikter anyqtaldy. Máselen, mınıstrlik qyzmetshileri «yntymaqtastyq» quzyretin tıisti deńgeıde kórsetpeı otyr, ıaǵnı bul másele múddeli taraptarmen konstrýktıvti ózara qatynastardy qurýǵa baılanysty.
Sonymen qatar óńirlik qyzmetshilerde kóbine «ózin-ózi damytý» kúsh-jigeri jetkiliksizdeý.
«Qazirgi kezde QR Prezıdenti janyndaǵy memlekettik basqarý akademııasy jeke qyzmettik ókilettikti damytý boıynsha baǵdarlamalardy ázirledi jáne olar basqarýdyń deńgeıine qaraı saralanǵan. Bul baǵdarlamalar aıasynda oqytý sharalary bıyl memlekettik qyzmetshilerdiń biliktiligin arttyrý aıasynda bastalady», - dep naqtylady Agenttik.
Jalpy , attestatsııa qorytyndysy boıynsha 61 115-i atqaryp otyrǵan laýazymyna sáıkes keledi, 4 851 adam qyzmetin joǵarylatýǵa, 747 adam tómendetýge, sondaı-aq 140 adam qyzmetinen bosatylýǵa usynyldy.
«Búginde attestatsııalyq komıssııanyń sheshimderi negizinde 1 405 qyzmetshi mansaptyq satyda joǵarylap, joǵary turǵan qyzmetke taǵaıyndaldy», - deıdi vedomstvo ókilderi.