Myńǵa tarta kıik múıizin shetel asyrmaq bolǵandar ustaldy

ASTANA. QazAqparat - 10 qarashada jedel aqparatty iske asyrý nátıjesinde UQK Shekara qyzmeti Jetisý oblysy boıynsha departamenti polıtsııa organdarymen jáne «Búrkit» arnaıy bólimshesiniń qyzmetkerlerimen birlesip, Qazaqstan Respýblıkasynyń bes azamatyn ustady, dep habarlaıdy QazAqparat.

Shekara qyzmetiniń málimetinshe, olardyń kóligin tintý barysynda jalpy salmaǵy 100 kg-nan asatyn 983 kıik múıizi tabylǵan.

«Ustalǵan adamdar jaqyn shetelge jónelte otyryp, derıvattarmen saýda jasady degen kúdikke ilindi.

Atalǵan fakt boıynsha QR QK-niń 339-baby boıynsha (Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sotqa deıingi tergep-tekserý bastaldy», - dep jazdy vedomstvodan.

Foto: gov.kz