«Myna jerge bomba túspeı me?» - Prezıdent Jýsan operatsııasynda qutqarylǵan balalar týraly aıtyp berdi
Bul týraly Memleket basshysy Nursultan Nazarbaev Astanada Jastar jylynyń resmı ashylýynda aıtyp berdi.
«Ár adam óz taǵdyryn ózi jasaıdy. Jaqynda Sırııadaǵy shıelenis aımaǵynan 47 qazaqstandyqty alyp shyqqanymyzdy bilesizder. Olardyń arasynda 30 bala bar, ákeleri soǵysta mert bolǵan, analary qorǵaýsyz qalǵan. Mundaı qaýipti ári mańyzdy operatsııany bizdiń arnaıy qyzmet ózge memlekettermen birlesip júrgizdi. Bizdiń azamattardy aldady, jumaqqa sendirdi, alyp ketti. Barlyq elder bul lańkesterdiń kózin joıýǵa tyrysyp jatyr. Lańkesterdiń arasynda bizdiń qazaqstandyqtar da bar. Júzdegen otandasymyz oqqa ushty. Aman qalǵandaryn elge qaıtarýdy jalǵastyramyz», - dedi Prezıdent.
Sonymen birge, Prezıdent shıelenis aımaǵynan oralǵandardy beıimdeý qajettigin eske saldy.
«Kishkentaı balalar ushaqtan túskende «Myna jerge bomba túspeı me?» dep sheshesinen suraıdy eken. Týǵannan bombaǵa úırengen... Eshqandaı bomba túspeıdi», - dedi N. Nazarbaev.
Eske sala ketsek, Qazaqstan Prezıdenti Nursultan Nazarbaev Qazaqstan azamattaryn Sırııadan evakýatsııalaýǵa baılanysty málimdeme jasaǵan bolatyn. Memleket basshysy atap ótkendeı, 6 qańtarda quqyq qorǵaý organdary men Syrtqy ister mınıstrligi júrgizgen gýmanıtarlyq shara nátıjesinde Sırııadan 47 azamatymyz, sonyń ishinde 30 bala elimizge qaıtaryldy.
Olarmen psıhologtar, dintanýshylar men pedagogtar qosymsha jumys isteıdi jáne joǵalǵan qujattardy qalpyna keltirý boıynsha kómek kórsetiledi. Karantın merzimi aıaqtalǵan soń, balalar men áıelder ózderiniń burynǵy mekenjaıyna jiberiledi.
Aıta keteıik, QR Prezıdenti Nursultan Nazarbaev Qazaqstan halqyna bıylǵy Joldaýynda 2019 jyldy Jastar jyly dep jarııalaýdy usynǵan bolatyn.
Jastar jylyna qatysty barlyq aqparatty «QazAqparat» agenttiginiń aranıy paraqshasynan oqýǵa bolady.