«Myń bala» jobasynyń aıasynda 280 myń jetkinshek qazaq tilin úırendi
Bul týraly QR Aqparat jáne áleýmettik damý vıtse-mınıstri Serik Egizbaev Qazaqstan halqy Assambleıasy uıymdastyrǵan Prezıdent Joldaýyna arnalǵan dóńgelek ústelde aıtty.
«Elimiz boıynsha barlyǵy 174 jeksenbilik mektep jumys atqarady, onyń ishinde 124 top qazaq tili kýrstaryn ótkizedi. Oǵan 1200-ge jýyq adam qatysady.
Sonymen qatar, Dostyq úıleriniń bazasynda turaqty negizde qazaq tilin oqytý boıynsha «Mámile» atty 18 pikirtalas klýby uıymdastyryldy, «Qazaqtaný» respýblıkalyq mádenı-aǵartýshylyq jobasy iske asyrylady», - dedi vedomstvo ókili.
Sondaı-aq, ol mınıstrlik «Qazaqstandyq etnostardyń alýan túrliligin rýhanı-mádenı tanymal etý» jobasyn iske asyryp jatqanyn aıtty.
«Bul joba qazaq halqynyń salt-dástúrleri men ádet-ǵuryptaryn zerdeleýge, qazaq tili men Qazaqstan etnostarynyń ana tilderin, aqyn-jazýshylardyń kórkem týyndylaryn zerdeleýge, halyq ertegilerin, tarıhty, dástúrli sheberlerdi jáne t.b. tanymal etýge júıelendirilgen. Joba sheńberinde elimizdiń barlyq óńirlerinde 130-ǵa jýyq is-shara ótkizilip, olarǵa 10 000-nan astam adam qatysty», - dedi vıtse-mınıstr.
Onyń aıtýyna qaraǵanda, jyl saıyn Qazaqstan halqy Assambleıasymen birlesip ótkiziletin «Uly dalanyń ultaralyq tili» respýblıkalyq forýmy da qazaq tilin etnosaralyq qatynas tili retinde nasıhattaýǵa baǵyttalǵan.
«Ortalyq jáne óńirlik deńgeıde 2015 jyldan bastap «Myń bala» respýblıkalyq mádenı-aǵartýshylyq jobasy júzege asyrylýda. Joba sheńberinde 1,5 mln bala qatysyp, onyń ishinde 280 myńǵa jýyq adam qazaq tilin meńgerýge tartyldy. Qazaq tiliniń qoǵamdaǵy qoldanys aıasyn keńeıtý baǵytyndaǵy jumystar atalǵan jobalar jáne basqa da is-sharalar sheńberinde óz jalǵasyn taba beretin bolady», - dedi Serik Egizbaev.