«Myń alǵys» jalpyrespýblıkalyq aktsııasy Sozaqta jalǵasty
Sozaq aýdany ákiminiń orynbasary Baǵdat Aıdarbekov bastaǵan top aýdandyq aýrýhananyń provızorlyq bólimshesinde óz otbasynan, balalarynan alystap, koronavırýspen kúrestiń aldyńǵy shebinde júrgen dárigerler men kishi medıtsınalyq qyzmetkerlerge alǵys bildirdi. Qurban aıt merekesimen quttyqtap, merekelik syı-sııapattaryn tartý etti.
Aýdan ákiminiń orynbasary B.Aıdarbekov «Qurmetti medıtsına qyzmetkerleri! Sizder elimizge pandemııa bastalǵaly beri kún-tún demeı arpalysyp, otbasylaryńyzdan jyraqta bilimderińiz ben kúshterińizdi jumsap, bastaryńyzdy qaýip-qaterge tigip aıanbaı eńbek etip jatyrsyzdar. Sizderge osynaý eńbekterińiz úshin alǵysymyz sheksiz. Sizderge myqty densaýlyq, kásibı órleý, otbasylaryńyzǵa baq-bereke tileımiz» dep aqjarma tilegin jetkizdi. Sozaq aýdandyq Ortalyq aýrýhanasynyń Bas dárigeri Talǵat Álisheruly Qaldybekov pen Taýkent kenti emhanasynyń meńgerýshisi Alma Meırambekqyzy Qurmanbekovanyń óńirlerine Qazaqstan halqy Assambleıasynyń «Meıirim» medalin taqty.
Aktsııaǵa Sozaq aýdany ákimdigi men Jastar Resýrstyq Ortalyǵy qyzmetkerleri, Jas Otan jastar qanatynyń músheleri, Value volonterlar uıymy belsene atsalysty.