Mýzyka qaıratkerleriniń odaǵy saılaýda belsendi bolýǵa shaqyrdy

NUR-SULTAN. QazAqparat - Búgin Qazaq ulttyq óner ýnıversıtetinde QR Mýzyka qaıratkerleri odaǵynyń «Kezekten tys saılaý - Demokratııalyq jolda» atty taqyrybyndaǵy otyrysy ótti, dep habarlaıdy QazAqparat.

Jıynǵa Halyq ártisi, QR Mýzyka qaıratkerleri odaǵynyń tóraǵasy Aıman Musahadjaeva jetekshilik etti.

«Biz táýelsiz memleketimizdiń qazirgi tarıhynyń mańyzdy oqıǵalarynyń kýágeri boldyq. Sońǵy aıdyń eń mańyzdy ishki saıası oqıǵalary Qazaqstan Respýblıkasy Konstıtýtsııasynyń mazmunynda bekitilgen jáne memlekettik bıliktiń sabaqtastyǵyn qamtamasyz etetin demokratııalyq rásimderge baılanysty... Elimizdiń mýzyka qaıratkerleriniń búkil ujymy Qazaqstan Prezıdentiniń aldaǵy saılaýyn ótkizýdiń barlyq mańyzdylyǵyn túsinedi. Sondyqtan kópshilikti 9 maýsymda belsendi bolyp, saılaý ýchaskelerine kelip, ózimizdiń demokratııalyq tańdaýymyzdy jasap, elimizdiń odan ári damýynyń baǵytyn anyqtaýda belsendi bolýǵa shaqyramyz» - dedi Aıman Musahadjaeva óz sózinde.

Sharaǵa kórnekti qoǵam qaıratkerleri men Qazaqstan Respýblıkasy Mýzyka qaıratkerleri odaǵynyń músheleri qatysty.

Foto: prp.kz