Muztaý shyńynda týrıstiń jaraqattanýyna baılanysty týrkompanııalarǵa tekserý júrgizilmek

ÓSKEMEN. QazAqparat – Shyǵys Qazaqstan oblysy Katonqaraǵaı aýdanyndaǵy Muztaý shyńynda týrıstiń jaraqat alýyna baılanysty týrkompanııalarǵa tekserý júrgizilmek, dep habarlaıdy QazAqparat tilshisi.

Katonqaraǵaı aýdany Muztaý shyńyndaǵy Sársembaı ýchaskesinde 22 shilde kúni oqys oqıǵa bolǵan edi. Taýǵa shyǵyp bara jatqan 27 jastaǵy áıel attan qulap, jaraqat alyp, esinen aıyryldy. Qutqarýshylar men dárigerler ony shuǵyl túrde tikushaqpen aýrýhanaǵa jetkizgen.

Búgin ShQO ákimdiginde ótken jınalys barysynda aımaq basshysy Ermek Kósherbaev týrısterdi taýǵa shyǵaratyn osyndaı kompanııalardy túgel tekserý kerektigin jetkizdi. Sebebi, óńirdegi kóptegen týrıstik baǵyttar, ásirese Altaı taýynyń eń bıik núktesi - Muztaý shyńy men Berel qorymyna aparatyn taýly jerler jolaýshyǵa qıyn ári qaýipti.

«Sol jerlerge arnaıy týr uıymdastyratyn kásipkerler týrısterdiń qaýipsizdigin qanshalyqty qamtamasyz ete alady? Osyny anyqtaý úshin týrkompanııalardy tekserý qajet. Moratorııdi qalqan qylý kerek emes. Sebebi, munda adamdardyń ómiri men qaýipsizdigi tur», - dedi ákim.