Mýzykany jasandy ıntellekten qorǵańyzdar: Amerıka juldyzdary ashyq hatqa qol qoıdy

<p>ASTANA. KAZINFORM — 200-den astam amerıkalyq ónerpaz jasandy ıntellekti (AI) «adam shyǵarmashylyǵyna shabýyl jasap jatyr» dep aıyptap, ashyq hatqa qol qoıǵan. Bul týraly <a href="https://nypost.com/2024/04/03/entertainment/katy-perry-more-warn-against-predatory-use-of-ai-in-open-letter-devalue-the-entire-music-ecosystem/" target="_blank" rel="noopener">New York Post</a> habarlady.</p>

Ónerpazdar jasandy ıntellekt jaqyn arada ártisterdiń túpnusqa daýysynyń tsıfrlyq kóshirmesin jasaýy múmkin dep alańdaýshylyq bildirdi.

Sondyqtan úndeý avtorlary elektrondy mýzyka avtorlarynan neıron jelilerin azyraq paıdalanýdy suraıdy.

«Jańa dáýirde shyǵarmashylyq adamdary jasandy ıntellektimen básekege túsýge májbúr. Neıron jelilerin orynsyz paıdalaný naǵyz mýzykanttar men jankúıerlerdiń qadirin aıaqasty etedi», — dedi Ónerpazdardyń quqyǵyn qorǵaý alıansynyń atqarýshy dırektory Djen Djeıkobsen.

Bul hatqa Bıllı Aılısh, Imagine Dragons, Nicki Minaj, Pearl Jam, Katy Perry, Jonas Brothers, Djýlııa Maıkls, Raıan Tedder jáne basqa da akterler, ánshiler men mýzykanttar qol qoıǵan.

«Biz, ánshiler men án avtorlary, sondaı-aq tómende qol qoıǵandar AI tehnologııasy kompanııalaryn, platformalaryn jáne tsıfrlyq mýzyka qyzmetterin bastapqy jasaýshylardyń quqyǵyn buzý jáne qunsyzdandyrý úshin neıron jelilerin paıdalanýdy toqtatýǵa shaqyramyz» delingen hatta.

Belgili bolǵandaı, keı kompanııalar prodıýserlik kompanııalardyń ruqsatynsyz ónerpazdardyń shyǵarmashylyq jumysyn ıemdenip, jasandy ıntellekt arqyly óńdep, kópshilikke usynǵan.

Bul — tikeleı áýenniń túpnusqasyndaǵy dybysy men beınesin aýystyrýǵa baǵyttalǵan is-áreket, ol shoý-bıznes ókilderiniń tabys kózine de keri áserin tıgizýde.