Mýzeı túni Almatyda qandaı is-shara ótedi
Almaty ákimdiginiń málimetinshe, 18 mamyr keshki saǵat 18:00-den túngi saǵat 00:00-ge deıin megapolıstegi mýzeılerde tarıh jáne ónersúıer qaýym úshin birqatar qyzyqty shara uıymdastyrylady.
Mýzeılerge kelýshiler eksklıýzıvti artefaktiler men sırek kezdesetin esponattardy, tarıhı keıipkerlerdiń qatysýymen teatrlandyrylǵan qoıylymdar tamashalaı alady.
Sondaı-aq kvestter men vıktorınalarǵa, qysh ydystar jasaý jáne ortaǵasyrlyq monetalardy soǵý, mýzykalyq aspaptar men zergerlik buıymdar jasaý boıynsha sheberlik synyptarǵa qatysýǵa múmkindik alady. Belgili mýzeıtanýshylar men ǵalymdar Almaty turǵyndary men qonaqtaryna avtorlyq ekskýrsııalar ótkizip, ınteraktıvti dárister júrgizedi.
Bul túni Almaty mýzeıleriniń barlyǵyna kirý tegin bolady. «Mýzeı túni» aktsııasy aıasynda kelýshiler mádenıet pen tarıh baǵytyndaǵy bilimin tarazylap, dáýirler men óner arqyly biregeı jáne ınteraktıvti álemge saıahattaı alady.
Aktsııa aıasynda qyzyqty sharalar uıymdastyratyn mýzeılerdiń tizimi:
- Almaty mýzeıi, Qabanbaı batyr kóshesi, 132
- Yqylas atyndaǵy halyq mýzykalyq aspaptar mýzeıi, Zenkov kóshesi, 24a
- D.A.Qonaev mýzeıi, Tólebaev kóshesi, 117
- N. Tilendıevtiń memorıaldyq mýzeıi, Qonaev kóshesi, 96
- S. Muqanov atyndaǵy ádebı-memorıaldyq mýzeıi, Tólebaev kóshesi 125
- Ǵ.Músirepov atyndaǵy mýzeı kesheni, Tólebaev kóshesi 130
- Mýltımedııalyq dástúrli mýzykalyq ortalyq, Nurkent 1, 5/11
- A. Baıtursynulynyń mýzeı-úıi, Baıtursynuly kóshesi, 60.
«Ekskýrsovodtar, aty ańyzǵa aınalǵan tulǵalardyń urpaqtary, mádenıet qaıratkerleri, ataqty artıster men tanymal blogerler mýzeılerge kelgen qala turǵyndary men qonaqtaryna mádenı-tanymdyq baǵdarlamalar usynady», - dep habarlady ákimdikten.
«Mýzeı túni» alǵash ret 1997 jyly Berlınde ótti. Halyqaralyq mýzeıler kúnine oraılastyrylǵan aktsııanyń maqsaty – mádenı mura men ónerdi nasıhattaý.
Qazaqstanda bul aktsııa 2006 jyldan bastap uıymdastyryp keledi