Mýzeıge jetkizbeı, syrtqa áketpek bolǵan – Saq dáýiriniń 9 jádigeri qalaı zańsyz aktıvke aınaldy
Zańsyz aktıvterdi elge qaıtarý jónindegi komıssııa zańsyz ıemdelgen qundy jádigerlerdiń elordadaǵy Ulttyq mýzeıge beriletini týraly birneshe ret aqparat taratqan. Astanada ótip jatqan Qazaqstan mýzeı kongresinde Ulttyq mýzeı dırektorynyń ǵylym jónindegi orynbasary Aqmaral Ibraeva osy jumystyń qandaı satyda ekenin aıtty.
«Biz qaıtarylǵan aktıvter boıynsha osyǵan jaýapty mekemelermen jumys istep jatyrmyz. Biraq zerttep, zerdeleý jumystary áli bitken joq. Bizge áli qaıtarylǵan joq. Tek qana ol mekemelerden usynys tústi. Ol usynys – jádigerlerdi zerttep, kezeńin, qundylyǵyn anyqtap berý týraly arnaıy hat joldaǵan. Sol hattyń aıasynda Saq dáýirine jatatyn 9 jádigerge saraptama júrgizip jatyrmyz. ıAǵnı, olardyń naqty qaı kezeńniń jádigeri ekenin, qundylyǵyn zerdeleımiz. Aldyn ala qorytyndysyn berdik te. Biraq zerthanalyq zertteýler áli júrgizilgen joq. Synamasy, ólshemi bar degendeı. Osynyń bári zerthana turǵysynda júrgiziledi. Ol jádigerler áli bizdiń qolymyzǵa berilgen joq», - dedi ol Kazinform tilshisiniń saýalyna bergen jaýabynda.
Sondaı-aq, ol atalǵan jádigerler ǵylymı ortaǵa burynnan málim buıymdar ekenin aıtady.
«Bul jádigerler Saq dáýirine jatatyn altyn buıymdar. «Altyn adamdardyń» boıynan tabylyp jatqan japsyrma, qapsyrma buıymdarǵa uqsas zattar. Bizdiń ǵylymı qyzmetkerlerdiń aıtýynsha, ol buıymdar zertteýshiler ortasyna baıaǵydan belgili bolǵan. Biraq mýzeıge túsip úlgermegen. Mýzeıge túspesten syrtqa shyǵarylatyn kezinde anyqtalǵan ǵoı. ıAǵnı, shetelge shyǵyp ketpegen. Al endi kimderdiń shyǵarmaq bolǵanyn, olardyń qolyna qalaı túskenin biz bilmeımiz. Ony bilýge quzyretimiz de joq», - deıdi mýzeı basshysynyń orynbasary.
Osyǵan deıin Buqar jyraý atyndaǵy ádebıet jáne óner mýzeıinde qazaq kınosynyń ańyzy Asanáli Áshimovtiń jeke zattary qoıylǵan kabınet ashylǵanyn habarladyq.