Muzdyń qalyńdyǵyn túsinen qalaı anyqtaýǵa bolady

<p>ÓSKEMEN. KAZINFORM &ndash; Shyǵys Qazaqstan oblysynyń qutqarýshylary muzdyń qalyńdyǵyn túsinen qalaı anyqtaýǵa bolatyndyǵyn túsindirdi.</p>

ShQO tótenshe jaǵdaılar departamenti baspasóz qyzmetiniń málimetine súıensek, qazir óńirde «Muz-2024» aktsııasy júrgizilip jatyr. Sonyń aıasynda qutqarýshylar eriktilermen jáne polıtseılermen birlesip 1300-den astam ret reıdke shyqty. Halyqqa muzdaǵy qaýipsizdik sharalaryn saqtaý qajettigi túsindirilýde. 

- Muzdyń qalyńdyǵyn túsinen anyqtaýǵa bolady. Muzdyń túsi sur bolsa ol tez synyp ketedi. Kógildir bolsa berik degen sóz. Qamys jáne basqa da ósimdikter ósetin jerlerde muz únemi juqa bolady. Sý aıdyndaryndaǵy qaýipsizdik erejelerine sáıkes qalyńdyǵy 25 santımetrden kem muzǵa shyqqan kezde ózińizben birge ysqyryq, qutqarý jıletin, dıametri keminde 11 mm arqan, uzyndyǵy keminde 2 metr taıaq alýyńyz qajet, - deıdi oblystyq TJD bastyǵynyń orynbasary Ishar Savazov.

Osy qaýipsizdik sharalaryn buzǵandar ákimshilik jaýapkershilikke tartylyp, aıyppul tóleıdi. 

Aıta keteıik, jyl basynan beri Shyǵys Qazaqstanda balyq aýlaý kezinde 4 balyqshy sýǵa batyp ketken. Barlyq oqıǵa qaýipsizdik sharalarynyń buzylýy saldarynan boldy.

Eske salsaq, osyǵan deıin Kúrshim aýdanynda balyq aýlap júrgen eki adam sýǵa batyp ketkeni habarlanǵan.