MýzART ánshisi Kenjebek estý qabileti tómen balalarǵa arnap ortalyq ashpaq

ALMATY. QazAqparat - Búgin Almatyda úzdik úsh áleýmettik joba avtorlary marapattaldy. Jylda uıymdastyrylatyn baıqaýǵa 18 joba iriktelip alynǵan, dep habarlaıdy QazAqparat tilshisi.

«Qazaqta jaqsy sóz bar. Jumyla kótergen júk jeńil degen. Osyndaı áleýmettik qaıyrymdylyq jobalardyń mańyzy artyp keledi. Bizdiń basty maqsatymyz - osy jobalardy memleketke kórsetý, qoǵamnyń nazaryn aýdarý, sol arqyly áleýmettik turǵydan muqtaj adamdardy ómir sapasyn jaqsartý bolyp tabylady», - dedi «Nur Otan» partııasy Almatydaǵy fılıaly tóraǵasynyń birinshi orynbasary Juldyz Omarbekova.

Usynylǵan 18 jobanyń ishinde qupııa daýys berý arqyly 3 joba úzdik dep tanyldy.

Atap aıtqanda, úshinshi oryndy «Eriktiler qozǵalysy álemdi ózgertedi» jobasynyń avtorlary Leıla Baıramova men Ámına Ermuhambetova ıelendi. Olarǵa konkýrs demeýshileri 500 myń teńge kóleminde syılyq berdi.

Ekinshi oryndy MýzART ansambliniń ánshisi Kenjebek Janábilovtiń «El nazy» art-terapııa ortalyǵy jobasy jeńip aldy.

Ánshi estý qabileti nashar balalardyń shyǵarmashylyǵyn damytýǵa múmkindik beretin ortalyq ashpaqshy. A.Baıtursynov pen Gogol kósheleriniń qıylysynda ornalasqan ortalyqqa dıagnozy qoıylǵan kez-kelgen bala kele alady.

«Bizdiń ortalyqta estý qabileti tómen, kahılıarly ımplant salynǵan balalarmen jumys jasalady. Men bul problemany ózimnen ótkizdim. Meniń ózimniń úlken ulym qulaǵy estimeıtin bolyp dúnıege keldi. Biz 7 jasyna deıin kóp ýaqyt sozyp júrip aldyq. Mıyna dybys kelmegen soń adamnyń mıy uıyqtap qalady eken. Kahılıarly ımplantty 6,5 jasynda ornattyq. Sodan bastap balamyz mektepke bardy, attarymyzdy aıtady», - dedi Kenjebek Janábilov.

Atalǵan ortalyqta ázirge 40 bala bilim alatyn bolady. Munda sýrdopedagogtar balalardy dombyra, vokal ónerine baýlıtyn bolady.

Júldeli birinshi oryndy «№1 mamandandyrylǵan áleýmettik kómek kórsetý ortalyǵy» memlekettik kásiporny «Jeke ómir súrý úıi» jobasymen jeńip aldy.

Atalǵan jobanyń avtory Danıpa Ysqaqova úzdik jumysy úshin 1 mln teńge kóleminde syılyq aldy.

Aıta ketý kerek, «Jeke ómir súrý úıi» byltyr mamyrda ashylǵan bolatyn. Munda 20 psıhologııalyq- mentaldy aýytqýy bar adam jeke ózderi ómir súrýdi úırenip jatyr. Mamandardyń aıtýynsha, osy adamdardyń 5-i qazir memlekettik mekemelerde jumys istep jatyr. Atalǵan úı múmkindigi psıhologııalyq naýqastardy áleýmettik qoǵamǵa beıimdeýge baǵyttalǵan.