Muz qalyńdyǵy birkelki emes: Soltústik Kaspııde ıtbalyqtardyń kúshikterine qaýip tónip tur

<p>ATYRAÝ. KAZINFORM &mdash; Kaspıı ıtbalyǵynyń bıologııasyna áser etetin tirshilik etý ortasy maýsymdyq kezeńge oraı ózgeredi. Itbalyq tek soltústik Kaspııdiń qazaqstandyq jáne reseılik sektorynda qatqan muz ústinde kúshikteıdi.</p>

Balyq sharýashylyǵy komıtetiniń baspasóz qyzmeti taratqan aqparatqa qaraǵanda, ıtbalyqtyń kúshikteý kezeńi qańtardyń sońǵy onkúndiginde bastalady. Kúshikteý kezeńi 25 aqpanǵa deıin sozylady.

«Itbalyq kúshiginde týǵannan keıingi alǵashqy kúnderde teri astynda maıy bolmaıdy. Teride tek qylshyǵy bar. Sondyqtan, kúshikter sýyq sýda uzaq ýaqyt bola almaıdy. Júni sýlanyp, ólip ketýi múmkin. Kúshikter 3-4 apta emý kezeńinde muz ústinde bolady. Kaspıı teńiziniń soltústik bóligindegi muz ıtbalyqtyń kóbeıýi men saqtalýyna mańyzdy ról atqarady», -dep habarlady komıtettiń baspasóz qyzmeti.

Kaspıı ıtbalyǵy popýlıatsııasynyń jaı-kúıine 2020 jyldan beri reseılik ǵalymdarmen birge monıtorıngtik zertteýler júrgizý qolǵa alynǵan. Onyń ishinde meteoderekter men spýtnıktik sýretter boıynsha muz órisiniń jaı-kúıine monıtorıng júrgizilgen.

​«Byltyr Soltústik Kaspııdegi qatqan muzdyń alańy 98 paıyz bolǵan edi. Teńizdiń ıtbalyq kúshikteıtin bóliginde muzdyń qatýy byltyrǵy jeltoqsannyń ekinshi onkúndiginde bastaldy. Qazir muz alańynyń aýdany — 67%. Muz qabatynyń qalyńdyǵy birkelki emes. Soltústik jáne soltústik-shyǵys bólikterdegi qalyńdyǵy 10-15 sm-ge deıingi aralyqty qurady. Al, jıekterde muz qalyńdyǵy ózgermeli, keı tusta 5-10 sm-ge jetedi. Buǵan 2023 jylǵy 1 jeltoqsannan 2024 jylǵy 13 qańtarǵa deıin Mańǵystaý oblysyndaǵy aýa temperatýrasynyń -3-ten +10 gradýsqa deıin ózgergeni áser etti. 2022-2023 jyldardaǵy uqsas kezeńdegi qysta aýa temperatýrasy 0-den -10-15 gradýsqa jetip, aıtarlyqtaı sýyq boldy», -dep naqtylady baspasóz qyzmeti.

«Qazgıdromet» RMK-nyń málimetinshe, bıyl 20 qańtar men 20 aqpan aralyǵynda kún +11 gradýsqa deıin jylıdy. Mundaı jylylyq muz alańyn 20-40% deıin qysqartýy múmkin.

​«Kaspııdiń soltústigindegi muzdyń qalyńdyǵy 10-15 sm deńgeıinde bolsa, ıtbalyqtyń jańa týǵan kúshikteriniń óliminiń kóbeıýine ákelip soqtyrýy múmkin. Bul jaǵdaı analyq ıtbalyqtardyń merziminde kúshikteýine teris áser etedi», -dep aqparat taratty baspasóz qyzmeti.

Qazir Balyq sharýashylyǵy komıtetiniń Jaıyq-Kaspıı oblysaralyq basseındik balyq sharýashylyǵy ınspektsııasynyń ınspektorlary men ǵylymı mekemelerdiń qyzmetkerleri ahýaldy turaqty baqylaýda ustap otyr.

Eske sala ketelik, budan buryn Kaspıı teńizi qazaqstandyq akvatorııasynyń soltústik bóligi tartylyp bara jatqanyn jazǵan edik.