Mustafa Kachalın: Túrki áleminiń birligi kóptegen saıası jáne ekonomıkalyq máselelerdi sheshedi

ASTANA. QazAqparat - Álem halyqtary kóptegen qundylyqtaryn joǵaltýymúmkin, mundaı qaip bar. Osy sebepti, túrki áleminiń birliginiń mańyzy asa zor. Halyqaralyq Túrki akademııasy (TWESCO) uıymdastyrǵan «Uly Dala» ІІІ Gýmanıtarlyq ǵylymdar forýmynyń ashylýynda Túrıkıadan kelgen Túrik til qurymynyń tóraǵasy, professor Mustafa Kachalın osylaı dedi, dep habarlaıdy QazAqparat tilshisi.

«Búgingi bizdiń forým Astana qalasynyń 20 jyldyǵyna jáne jazýshy Shyńǵys Aıtmatovtyń 90 jyldyǵyna, sonymen qatar aqyn Maǵjan Jumabaevtyń 125 jyldyǵyna tuspa-tus kelip otyr. Men munda Túrik til qurymynyń atynan keldim. Qazir álemde kóptegen qundylyqtardyń joıylyp bara jatqan ýaqyty. Sondyqtan, biz óz qundylyqtarymyzdy eýropalyq oılaý júıesinen bólip alyp, óziniń ereksheligin, adamı jáne mádenı biregeıligin saqtap qalýǵa barymyzdy salýymyz kerek. Ony mindetti túrde damytýymyz qajet», - deıdi Mustafa Kachalın.

Professordyń aıtýynsha, qazirgi jastar eki ortada ómir súrgenimen, olardyń mentalıteti ortaq bolsa - bir qoǵamnyń ókili bola almaıdy.

«Biz qazir túrki memleketteriniń qoǵamdary qalaı damyp kele jatqanyn aıtyp bergimiz keledi. Túrki memleketteri ártúrli aımaqtarda jatyr. Biz birlikke umtylyp, mádenı qarym-qatynasymyzdy jan-jaqty damytýǵa barynsha kúsh salýymyz kerek. Túrki álemi uǵymynyń aýqymy óte keń. Halyqtyń birligi, túrki áleminiń birligi - bizge kóptegen saıası jáne ekonomıkalyq máselelerdi sheshýge sep bolary anyq. Sondyqtan, túrki áleminiń yntymaǵy úshin osy forýmnyń mańyzy asa zor. Men uıymdastyrýshylarǵa alǵysymdy bildirgim keledi», - dedi Mustafa Kachalın.

Eske sala ketsek, Astanada búgin Halyqaralyq Túrki akademııasy (TWESCO) uıymdastyrǵan «Uly Dala» ІІІ Gýmanıtarlyq ǵylymdar forýmy ótip jatyr. Bıylǵy forým «Uly Dala» Astananyń 20 jyldyǵyna, sonymen qatar aqyn Maǵjan Jumabaevtyń - 125, jazýshy Shyńǵys Aıtmatovtyń - 90, Ázerbaıjan Halyq respýblıkasynyń -100, Tomsenniń Túrki jazýyn oqýynyń 125 jyldyǵyna arnalyp otyr.