Mýsın boryshkerdi ýaqtyly habardar etýdi sheshilmeıtin problema dep atady
«Jalpy, mańyzdy máseleler atqarýshylyq is júrgizý salasyn avtomattandyrý arqyly sheshimin tapty. Búgingi kúni is júrgizý áreketteriniń 70 paıyzy avtomattandyrylǵan aqparattyq júıede júzege asady. Atqarýshylyq is júrgizý taraptary materıaldarmen onlaın tanysa alady jáne protsestik ótinishhattardy taraptardyń kabıneti arqyly beredi. Avtomattandyrylǵan aqparattyq júıesine tirkelý osy múmkindikti ashady. Alaıda problemalar áli de jetkilikti. Barlyq bankter bizdiń júıemen biriktirilmegen. 27 bankten 14 bank aqparattyq almasýǵa qosylǵan. Bul oryndatý júıesin tolyq kólemde avtomattandyrýǵa, banktermen ózara is-qımyldy jeńildetýge múmkindik beredi. Azamattardyń qaryzdy tóleý múmkindikterin edáýir keńeıtedi, olardyń ómirlik belsendiligin jeńildetedi», - dedi Qanat Mýsın Májilistegi Úkimet saǵatynda.
Sondaı-aq, mınıstrdiń atap ótýinshe, kólikke tyıym salý/alyp tastaý jáne júrgizýshi kýáligi qoldanysyn shekteý máseleleri boıynsha Іshki ister mınıstrligimen ıntegratsııa joq.
«Búgingi tańda úlken jáne is júzinde sheshilmeıtin problema – ol taraptardy habardar etý. Aqparattyq júıemizde qazirgi ýaqytta SMS-habarlama bar. Biraq bul shara tıimsiz. Óıtkeni ol habarlamany boryshkerge nemese óndirip alýshyǵa tıisti túrde jetkizýin qamtamasyz etpeıdi. Al poshta arqyly habarlama jiberý – ol jetkizý merzimi men quny boıynsha arhaızm ekeni anyq. Habarlamany bir tapsyrys hat arqyly jiberý úshin shamamen 400 teńge jumsalady», - dedi ol.
Qanat Mýsınniń aıtýynsha, memlekettiń quqyqtyq júıesinde boryshkerdi ýaqtyly habardar etý mindetti shart sanalady. Bul tek sot oryndaýshylary úshin ǵana emes, barlyq ákimshilik organdar úshin de mindetti.
«Qazirgi ýaqytta mınıstrlik bul máseleni sheshimin tabý jumystaryn júrgizýde. Tıisti usynystar jaqyn arada Úkimetke engiziletin bolady», - dedi mınıstr.