Múshelik aıasyndaǵy jumystarǵa daıyndyq qyza tústi

ASTANA. QazAqparat - Qazaqstan Respýblıkasynyń Syrtqy ister mınıstrligi 2017 jyldyń 1 qańtarynda bastalatyn BUU Qaýipsizdik Keńesiniń turaqty emes múshesi retindegi jumys baǵdarlamasynyń mazmundy bóligine daıyndyqty jalǵastyrýda, dep «Egemen Qazaqstan» respýblıkalyq gazeti habarlady Qazaqstan Respýblıkasy Syrtqy ister mınıstrliginiń baspasóz qyzmetine siltememen.

Málimdelgen basymdyqtar qataryn­­da ıadrolyq qarýsyzdaný jáne taratpaý, terrorızmmen jáne ekstre­mızm­men kúres, bitimgershilik pen beı­bit qurylys máselelerimen qatar, qaýip­sizdik pen Ortalyq Azııa óńirin damytý máseleleri bar.

Qazaqstannyń BUU Qaýipsizdik Keńesiniń múshesi bolǵan Ortalyq Azııa­daǵy alǵashqy el ekeni belgili. Osy rette búkil óńirdiń múddesin qor­ǵaý­ǵa da daıyn. Sondyqtan Qazaq­stan, BUU Qaýipsizdik Keńesindegi ju­my­sy tur­ǵysynan alǵanda, óńirlik proble­ma­lardy sheshýge qaı jaǵynan yqpal ete alǵan bolar edi degen másele mańyzdy.

Osyǵan oraı, Memleket basshysy­nyń tapsyrmasy boıynsha Qazaqstan Respýblıkasynyń Syrtqy ister mı­nıstri Erlan Ydyrysov jyl sońy­na deıin Ortalyq Azııa men Aýǵan­stan memleketterine arnaıy sapar­men baryp, BUU-nyń basty saıası or­ga­ny­nyń alańynda óńirlik taqyryptardy ilgeriletý boıynsha úılestirý turǵy­sy­nan kelissózder júrgizetin bolady.

Belgilengen maqsat sheńberinde 24-25 qarasha kúnderi Syrtqy ister mınıstri Kabýl men Dýshanbe qalalarynda boldy. E.Ydyrysovty eki el astanasynda da memleketter bas­shy­lary - Aýǵanstan Prezıdenti Mo­ham­mad Ashraf Ǵanı men Tájikstan Pre­zı­­denti Emomalı Rahmon qabyl­da­dy. Qazaqstan Syrtqy saıasat ve­domst­vo­synyń basshysy atalǵan el­der­­diń pre­zıdentterine Elbasy Nursultan Nazarbaevtyń arnaıy jol­daýyn tabys etti. Onda 2017-2018 jyl­dary Qazaq­stannyń BUU Qaýipsizdik Keńe­sin­degi jumysy aıasynda ortaq mindet­ter­di sheshý úshin ózara is-qımyl­dyń tıim­di arnalaryn tabý boıynsha áre­ket­tes­tikti jolǵa qoıý týraly aıty­lady.

Mohammad Ashraf Ǵanımen kezdesýi kezinde qazaqstandyq mınıstr elimiz­diń óńirlik qaýipsizdik máselelerin sheshý baǵytyndaǵy jumystar aıasyn­da Aýǵan­standaǵy jaǵdaıdy turaq­tan­dyrý perspektıvalaryna baılanys­ty máselelerge basa mańyz beretinin atap kórsetti. Ózi tarapynan Aýǵan­stan Pre­zı­denti Qazaqstandy BUU Qaýip­siz­dik Keńesiniń turaqty emes músheli­gine saılanýymen quttyqtady. Qazaq­stan­nyń 2009 jyldan bastap Aýǵan­stan jastaryn elimizde oqytyp jat­qan bilim berýdiń memlekettik baǵdarlamasyna óziniń rızashylyǵyn bildirdi. Nátıjesinde 1 myńnyń shama­synda aýǵanstandyq stýdent Qazaq­stannyń joǵary jáne orta tehnıkalyq oqý oryndarynda oqyp, tıisti bilim alatyn bolady.

Qazaqstannyń BUU Qaýipsizdik Keńesiniń aldaǵy turaqty emes múshe­ligi kezinde atqaratyn jumystary, osy aıada eki el arasyndaǵy saýda-ekono­mıkalyq, ınvestıtsııalyq, bilim berý jáne gýmanıtarlyq salalardaǵy yntymaqtastyq máseleleri Erlan Ydyrysovtyń Aýǵanstan Atqarý­shy bıliginiń basshysy Abdýlla Abdýl­lamen jáne onyń orynbasary Mohammad Mohakkekpen, Aýǵanstan Pre­zı­­dentiniń Ulttyq qaýipsizdik máse­­leleri jónindegi keńesshisi Hanıf At­mar­­men jáne Aýǵanstan syrtqy is­ter mınıstri Salahýddın Rabbanımen kez­­desý­leri kezinde talqylandy.

Keshe Qazaqstan Syrtqy saıasat vedomstvosy basshysynyń Ortalyq Azııa elderine týrnesi Dýshanbede jal­ǵasyp, ony Tájikstan Prezıdenti Emomalı Rahmon qabyldady. Mazmundy áńgime barysynda E.Ydyrysov kór­­shi el memleketiniń basshysyna Qazaq­­stan Prezıdenti Nursultan Nazarbaevtyń ystyq sálemin joldap, eki el mem­lekettik organdarynyń Qazaq­­stan Prezıdentiniń 2015 jyldyń qyr­­kúıeginde Dýshanbege jasaǵan res­­mı saparynyń qorytyndylary ná­tı­­je­sinde qol jetkizilgen ýaǵda­las­tyqtardy oryndaý jaıymen tanystyrdy.

E.Ydyrysov Tájikstan basshysyna Qazaqstannyń 2017-2018 jyldarǵa BUU Qaýipsizdik Keńesiniń turaqty emes músheligine kandıdatýrasyn qol­da­ǵany úshin rızashylyǵyn bildir­di. Mınıstr Qazaqstannyń aldaǵy mıssııanyń jaýapkershiligi joǵary ekenin jaqsy túsinetinin jáne ony atal­ǵan alańda Ortalyq Azııa memle­ket­­teriniń ortaq múddesin kóterý múm­kin­digi retinde qarastyratynyn atap kórsetti. Osy oraıda E.Ydyrysov Tájik­stan Prezıdentine óziniń Kabýl­daǵy kelissózderiniń nátıjeleri týraly aıtyp berdi.

Óz kezeginde E.Rahmon Qazaqstan­men ekijaqty qyzyǵýshylyq tanyty­latyn salalardaǵy ózara tıimdi ynty­maqtas­­tyqty ári qaraı nyǵaıtýǵa Dýshan­be­niń árqashan daıyn ekenin bildirdi.

E.Ydyrysov, sondaı-aq, Tájikstan syrtqy ister mınıstri Sırodjıddın Aslovpen kelissóz júrgizse, onda eki­jaq­ty negizdegi yntymaqtastyq pen halyq­ara­lyq uıymdar sheńberindegi árekettes­tik máseleleri talqylandy. Tájik­stan­dyq mınıstr Qazaqstannyń óńirden BUU Qaýipsizdik Keńesiniń turaq­ty emes músheligine alǵashqy bolyp ókildik etetin faktisin joǵary baǵalady.

Dýshanbedegi kezdesýlerde, sony­men qatar, Ortalyq Azııadaǵy sý-ener­getıkalyq keshenniń problematıkasy boıynsha pikir almasý­lar boldy. Bar­lyq múddeli taraptardyń tala­byn qana­ǵattandyrýǵa qabiletti jalpy­óńir­lik sheshimderdi izdestirýde oń úrdis baıqalyp otyrǵany da nazardan tys qalǵan joq.

Eki sapardyń da ashyq jáne izgi únqatysý aýanynda ótkenin atap ótken oryndy.