Murnyn buzyp ketken – Almatyda bir kúnde eki HQO qyzmetkeri zardap shekti

NUR-SULTAN. QazAqparat – Elimizde HQO qyzmetkerlerine tap berý jaǵdaılary tyıylatyn emes. «Azamattarǵa arnalǵan úkimet» memlekettik korporatsııasynyń Qoǵammen baılanys departamentiniń basshysy Murat Jumanbaı osylaı dabyl qaǵyp otyr, dep habarlaıdy QazAqparat tilshisi.

«Almatyda HQO qyzmetine qol jumsaýǵa qatysty eki jaǵdaı tirkeldi. Sondaı jaǵdaılardyń biri Almaly aýdandyq HQO-da boldy. Er adam óziniń kámeletke tolǵan qyzy úshin mekenjaı anyqtamasyn almaq bolǵan. Atalmysh memlekettik qyzmettiń standartyna sáıkes, er adam óziniń jeke kýáligin, týystyǵyn rastaý úshin qyzynyń jeke kýáligi men týý týraly kýáligin berýi tıis edi. Er adamǵa qujattardyń tolyq paketi kerek ekeni birneshe márte eskertilse de, ol mindetti qujattarsyz anyqtamany berýdi talap etken. Osydan keıin HQO qyzmetkeri bul qujatty berýden bas tartqannan soń er adam ony bir uryp, murnyn syndyryp ketken», - dep jazdy Murat Jumanbaı Facebook-tegi paraqshasynda.

Onyń aıtýynsha, dál sol kúni Áýezov aýdanynyń Halyqqa qyzmet kórsetý ortalyǵynda osyǵan uqsas jaǵdaı tirkelgen.

«Ol jerde ataýly áleýmettik kómekti resimdeý úshin bir áıel kelgen. Oǵan qajetti anyqtama egov.kz elektrondy úkimet portalynda onlaın túrde qoljetimdi. Ózdiginen ala salýǵa bolatyn qujat. Álgi áıel HQO keńesshisine kelip, atalǵan anyqtamany alý úshin kómek suraıdy. Keńesshi kelisip, alyp bermek bolǵan kezde anyqtama portalda uzaq ýaqyt boıy óńdele bastaıdy. Aqyry, áıel shydamaı, daýys kóterip, memlekettik korporatsııa qyzmetkerine dene jaraqatyn salǵan», - deıdi ol.

Eki jaǵdaıda da HQO qyzmetkerleri patrýldik polıtsııany shaqyrǵan. Qazirgi ýaqytta atalǵan materıaldar aýdandyq polıtsııa basqarmalarynda jatyr.

Murat Jumanbaı 22 tamyzda da Shymkentte er adam HQO qyzmetkerin uryp, jábir kórsetkenin aıtady.