Murat Jurynov basqaratyn Ulttyq ǵylym akademııasy taraýy tıis
«KSRO kúıregen 90-shy jyldary memlekettik mártebesi bolǵan, akademık Qanysh Sátbaev negizin qalaǵan Ǵylym akademııasy mártebesin joǵalta bastady. Sol kezde akademııada birneshe transformatsııa boldy. Máselen, óte bir qyzyq format – sol kezdegi Bilim mınıstri Shkolnık Ǵylym akademııasynyń prezıdenti laýazymyn qosa atqarǵan. 2003 jyly akademııa memlekettik emes uıym retinde bólinip shyǵyp, memlekettik mártebesin joǵaltty. Osy kúnge deıin Murat Jurynov basqaryp kele jatqan akademııa respýblıkalyq memlekettik emes qoǵamdyq birlestik retinde jumysyn atqaryp keledi. Onyń óziniń birneshe quzireti boldy. Mysaly, ol jyl saıyn ǵylym týraly esepti pysyqtap, Prezıdentke usynady. Birneshe ǵylymı basylym shyǵaryp, basqarady», - dedi mınıstr Jibek Joly telearnasynyń «Ýáde» baǵdarlamasyna bergen suhbatynda.
Saıasat Nurbektiń aıtýynsha, byltyr Prezıdent akademııaǵa memlekettik mártebe berý týraly sheshim qabyldady. Sondyqtan, bıyl sáýir aıynda Ulttyq ǵylym akademııasy kommertsııalyq emes aktsıonerlik qoǵam formatynda quryldy. Buǵan qosa Prezıdent Jarlyǵymen oǵan Prezıdent janyndaǵy mártebesi berildi.
«Jańadan qurylǵan akademııaǵa qatysty sońǵy daıyndyqtardy pysyqtap jatyrmyz. Zańnamalyq bazasyn jetildirýdemiz. Endi jańadan qurylǵan akademııaǵa akademıkterdi saılaý protsesi bastalady. Osy jyldyń sońyna deıin ol protsesti aıaqtaýdy josparlap otyrmyz. Osydan keıin memlekettik emes akademııa (Murat Jurynov basqaratyn Ulttyq ǵylym akademııasy) sheshim qabyldaýy tıis. Zańǵa sáıkes, memlekettik emes uıymdar ózderi sheshim qabyldap, taraýy qajet. Qazir osy eki protsess júrip jatyr. Prezıdent janyndaǵy Ulttyq ǵylym akademııasyn tikeleı qarjylandyrý kózdelgen. 700-800 mln teńge bólinedi», - dedi ol.