Murat Tóleýbaev Túrkistan oblystyq sybaılas jemqorlyqpen kúres departamentiniń basshysy boldy
Túrkistan oblysyna Qazaqstan Respýblıkasynyń Sybaılas jemqorlyqqa qarsy is-qımyl agenttigi tóraǵasynyń orynbasary Darhan Quraqbaev kelip, oblys aktıvi men quzyrly organ basshylarymen kezdesti. Jıynda Qazaqstan Respýblıkasy Sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń basshysy bolyp taǵaıyndalǵan Murat Ahtanuly Tóleýbaev tanystyryldy.
«Búgin departamenttiń basshysyn tanystyrý úshin qasıetti qala Túrkistanǵa kelip otyrmyn. Murat Ahtanuly óte tájirıbeli azamat. El Prezıdenti men agenttik tóraǵasy qoıyp otyrǵan tapsyrmalar men mindetterdi sapaly oryndaıdy dep senemin»,- dedi Darhan Quraqbaev.
Jemqorlyqpen kúres – qoǵamnyń ortaq mindeti ekenin aıtyp ótken Túrkistan oblysynyń ákimi Darhan Satybaldy Murat Ahtanulynyń qyzmetine sáttilik tiledi.
«Prezıdentimiz Qasym-Jomart Toqaev jemqorlyqpen kúres máselesine erekshe nazar aýdarady. Jemqorlyqqa qarsy jumystar bizdiń óńirde turaqty túrde júrgizilip keledi. Bul bizdiń udaıy nazarymyzda turǵan másele. Osy baǵytta ári qaraı da birlesip jumys isteımiz dep senemin», - dedi Darhan Satybaldy.
Murat Ahtanuly Tóleýbaev 1974 jyly Almaty qalasynda dúnıege kelgen.
Bilimi – joǵary. 1996 jyly «Turan» ýnıversıtetin, 2003 jyly L.N.Gýmılev atyndaǵy Eýrazııa ulttyq ýnıversıtetin bitirgen. Bilim boıynsha mamandyǵy zańger, áleýmettik salada ekonomıst-menedjer.
Eńbek jolyn 1996 jyly Almaty garnızony áskerı prokýrory kómekshisiniń mindetin atqarýshy bolyp bastaǵan. Keıinnen Almaty garnızony áskerı prokýrorynyń kómekshisi, Bas áskerı prokýratýrasy 3-bóliminiń áskerı prokýrory, Bas áskerı prokýrordyń memlekettik organdardyń ortalyq apparattarymen ózara is-qımyl jónindegi aǵa kómekshisi, Astana qalasy Bas áskerı prokýratýrasy ókildiginiń memlekettik organdardyń ortalyq apparattarymen ózara is-qımyl jónindegi Bas áskerı prokýrordyń aǵa kómekshisi, Ortalyq aımaqtyq kólik prokýratýrasy Astana qalasynyń avıatsııalyq kólik prokýrory qyzmetterin atqarǵan.
Sondaı-aq, Atyraý oblysy prokýrorynyń orynbasary, Atyraý oblysy boıynsha ekonomıkalyq jáne sybaılas jemqorlyq qylmystaryna qarsy kúres departamentiniń bastyǵy, Atyraý oblysy boıynsha Memlekettik kirister departamenti basshysynyń orynbasary, Qostanaı oblysy prokýrorynyń orynbasary laýazymdarynda eńbek etti.
Qazaqstan Respýblıkasynyń Sybaılas jemqorlyqqa qarsy is-qımyl agenttiginiń Aqmola oblysy boıynsha departamentiniń basshysy, Qazaqstan Respýblıkasynyń Sybaılas jemqorlyqqa qarsy is-qımyl agenttiginiń Preventsııa qyzmetiniń basshysy, Qazaqstan Respýblıkasynyń Sybaılas jemqorlyqqa qarsy is-qımyl agenttiginiń Qaraǵandy oblysy boıynsha departamentiniń basshysy boldy.