Murat Nurtileýdi Ózbekstan prezıdenti Shavkat Mırzıeev qabyldady
Ózbekstan Prezıdenti sońǵy jyldary qol jetkizilgen ekijaqty ózara is-qımyldyń joǵary deńgeıin qanaǵattanýshylyqpen atap ótip, qazaq-ózbek strategııalyq seriktestigi men odaqtastyǵyn nyǵaıtý maqsatynda Qazaqstanmen kópjaqty yntymaqtastyqty odan ári damytýdyń mańyzdylyǵy týraly aıtqan.
«Óz kezeginde M.Nurtileý Ózbekstan basshysyna Qazaqstan Prezıdenti Qasym-Jomart Toqaevtyń jyly lebizderi men izgi tilekterin jetkizdi, sondaı-aq 2021-2022 jyldary asa joǵary deńgeıde qol jetkizilgen ýaǵdalastyqtardyń iske asyrylýy týraly habardar etti», - delingen QR SІM málimetinde.
Sol kúni Qazaqstan SІM basshysy Ózbekstannyń Syrtqy ister mınıstri Bahtıer Saıdovpen kelissózder júrgizgen. Taraptar qazaq-ózbek yntymaqtastyǵynyń qazirgi jaǵdaıy men damý perspektıvalary týraly pikir almasyp, óńirlik jáne halyqaralyq kún tártibindegi ózekti máseleler boıynsha «saǵat teńestirdi».
«Taraptar sońǵy jyldary ekijaqty qatynastar buryn-sońdy bolmaǵan deńgeıge jetkenin málimdedi. Atap aıtqanda, ótken jyly Odaqtastyq qatynastar týraly tarıhı shartqa qol qoıyldy, úkimet, parlament jáne óńirlik deńgeılerde belsendi baılanystar júrgizilýde, ózara taýar aınalymynyń kólemi rekordtyq kórsetkishke – 5 mlrd dollarǵa jetti, ónerkásiptik kooperatsııa salasyndaǵy birlesken iri jobalar tabysty iske asyrylýda.
Saýda, ónerkásiptik kooperatsııa, energetıka, kólik-logıstıka, sý qatynastary, aýyl sharýashylyǵy, mádenıet, ǵylym jáne bilim salalaryndaǵy qazaq-ózbek yntymaqtastyǵyn keshendi damytýǵa baǵyttalǵan eki memleket basshylary qoıǵan mindetterdi tolyq iske asyrýǵa erekshe nazar aýdaryldy», - delingen habarlamada.
Kelissózder qorytyndysy boıynsha ekijaqty formatta jáne halyqaralyq uıymdar alańdarynda syndarly ózara is-qımyldy jalǵastyrýǵa baǵyttalǵan Qazaqstan men Ózbekstan Syrtqy ister mınıstrlikteri arasyndaǵy 2024-2025 jyldarǵa arnalǵan yntymaqtastyq baǵdarlamasyna qol qoıyldy.
Sapar aıasynda qazaqstandyq delegatsııa Tashkent qalasynyń Tehnologııalyq parkine baryp, onyń qyzmetimen tanysty, sondaı-aq qazaqtyń uly oıshyly jáne aqyny Abaı Qunanbaevtyń eskertkishine gúl shoqtaryn qoıý rásimine qatysty.