Murat Nurtileý Nıý-Iorkte birqatar is-sharaǵa tóraǵalyq etedi
«Premer-Mınıstrdiń orynbasary – Syrtqy ister mınıstri Murat Nurtileý 2023 jylǵy 17-22 qyrkúıekte BUU Bas assambleıasynyń Nıý-Iork qalasyndaǵy 78-sessııasynyń joǵary deńgeıdegi segmentine qatysady. Qazaqstan SІM basshysynyń BUU jelisi boıynsha kópjaqty is-sharalarǵa qatysýy, sondaı-aq Amerıka, Eýropa, Azııa jáne Taıaý Shyǵys memleketteriniń syrtqy saıası vedomstvolarynyń basshylarymen, Islam yntymaqtastyǵy uıymy men Órkenıetter alıansynyń Bas hatshylarymen ekijaqty kezdesýler josparlanǵan. Oǵan qosa, BUU Bas Assambleıasynyń alańdarynda Túrki memleketteri uıymynyń Syrtqy ister mınıstrleri keńesiniń otyrysy, Shanhaı yntymaqtastyq uıymyna múshe memleketterdiń Syrtqy ister mınıstrleri keńesiniń kezekten tys otyrysy, Azııadaǵy ózara is-qımyl jáne senim sharalary keńesi Syrtqy ister mınıstrleri keńesiniń beıresmı otyrysy jáne Ujymdyq qaýipsizdik týraly shart uıymyna múshe memleketterdiń Syrtqy ister mınıstrleriniń jumys kezdesýi ótedi», - dedi ol vedomstvoda ótken brıfıngide.
Sonymen qatar, onyń atap ótýinshe, 20 qyrkúıekte Nıý-Iorkte Murat Nurtileýdiń tóraǵalyǵymen Shanhaı yntymaqtastyq uıymyna múshe memleketterdiń Syrtqy ister mınıstrleri keńesiniń kezekten tys otyrysy uıymdastyrylady. Kún tártibine Shanhaı yntymaqtastyq uıymyn damytý perspektıvalary, onyń áleýetin jetildirý, sondaı-aq ózekti halyqaralyq jáne óńirlik problemalar turǵysynan atalǵan uıymnyń BUU-men ózara is-qımylyn tereńdetý máseleleri kiredi. Atalǵan is-shara Memleket basshysynyń ShYU tetikteri men organdarynyń qyzmetin reformalaý jónindegi bastamasyn iske asyrý boıynsha pikir almasý maqsatynda ótkiziledi.
«21 qyrkúıekte BUU Bas assambleıasynyń aıasynda Qazaqstannyń tóraǵalyǵymen Azııadaǵy ózara is-qımyl jáne senim sharalary keńesiniń Syrtqy ister mınıstrleri keńesiniń beıresmı otyrysy ótedi. Іs-sharaǵa AÓSShK múshe memleketteriniń syrtqy saıası vedomstvolarynyń basshylary qatysyp, 6-shy Sammıttiń sheshimderin iske asyrý máseleleri men Azııa keńesiniń kún tártibindegi ózekti suraqtardy talqylaıdy. Kezdesý qorytyndysy boıynsha Azııa keńesin transformatsııalaý týraly Jol kartasy jáne Syrtqy ister mınıstrleri keńesiniń turaqty damý maqsatynda volonterlikti ilgeriletý týraly málimdemesiniń qabyldanýy josparlanǵan»,- dedi resmı ókil.
Munan bólek, 22 qyrkúıekte Nıý-Iorkte BUU Bas assambleıasynyń alańynda Túrki memleketteri uıymynyń Syrtqy ister mınıstrleri keńesiniń beıresmı otyrysy ótedi.
«Otyrysqa Syrtqy ister mınıstri Murat Nurtileý qatysady. Qatysýshylar 2023 jylǵy 3 qarashada Astana qalasynda ótetin Túrki memleketteri uıymynyń 10-shy sammıtine daıyndyq, BUU Bas assambleıasynda Túrki memleketteri uıymynyń baıqaýshy mártebesin alý, sondaı-aq uıym aıasynda yntymaqtastyqty odan ári nyǵaıtýdyń basqa da máselelerin talqylaıdy», - dedi Aıbek Smadııarov.