Murat Baqtııaruly: Táýelsizdiktiń altyn arqaýy – ulttyq múdde
«Qazaqstan Respýblıkasynyń Prezıdenti Qasym-Jomart Kemeluly Toqaev bıylǵy 5-shi qańtary kúngi Egemen Qazaqstan gazetinde osy jyly elimizdiń táýelsizdigine 30 jyl tolatyndyǵyn jáne tarıhtyń osy bir asa qysqa merziminde qandaı tarıhı jetistikter men tabystarǵa qol jetkizgendigimiz jaıly jan-jaqty baıandap berdi. Prezıdentimiz aıtyp otyrǵanyndaı, biz úshin Táýelsizdik bárinen de qymbat ekendigin árbir qazaqstandyq jete sezine bilýge tıisti. Táýelsizdik jyldary qol jetkizgen tabystarymyzdy da eshkim joqqa shyǵara almaıdy. Biz endigi arada Táýelsiz Qazaqstannyń otyz jylda qol jetkizgen tabystaryn baıandy ete otyryp, el egemendigin odan ári nyǵaıtýǵa mindettimiz. Qazir álem boıynsha pandemııa indetiniń taralýyna baılanysty áleýmettik jáne ekonomıkalyq salada kúrdeli jaǵdaı qalyptasyp otyrǵany belgili. Іndettiń zardaptary bizdiń elimizdi de aınalyp ótpegendigi anyq», - dedi senator.
Sonymen qatar M. Baqtııaruly Qazaqstandy birtutas memeleket retinde álem moıyndanyn eske saldy.
«Prezıdentimizdiń maqalasynda qasıetti qazaq jeri – eń basty baılyǵymyz dep atap kórsetilgen. Endigi arada jerimizdiń tutastyǵyna kúmán keltirýdiń qajeti joq jáne bul oraıda syrtqy arandatýshylardyń áreketterine ermeı, ejelgi kórshilerimizben yntymaǵymyzdy, birligimizdi joǵaltpaý qajettigi aıtylady. Qazaqstan birtutas memelket ekendigin álem moıyndaǵaly qashan!
Memleket basshysy óziniń osy maqalasynda ulttyq múddeniń táýelsizdiktiń altyn arqaýy ekendigine basa nazar aýdaryp otyr. Bul oraıda, memlekettik tildiń elimizdiń basty nyshandarynyń biri ekendigi retinde qarastyrylýy ábden oryndy. Sondyqtan da, Qazaqstannyń memlekettik tili – qazaq tili ekendigine basa nazar aýdarylyp, bul tildi búkil halqymyzdy biriktirýshi kúshke aınaldyrý qajettigi óte jaqsy aıtylypty. Endigi másele ózimizde ekeni aqıqat. Ár qazaq balasy eń áýeli óziniń ana tiline ózi qamqor bolýǵa tıisti. Ósip kele jatqan urpaǵymyzdy óz tilinde tárbıeleý ár ata-ananyń ult aldyndaǵy paryzy bolsa kerek», - dedi depýtat.
«Sonymen birge, Prezıdent Qazaqstannyń árbir azamatynyń memlekettik tildi bilýi paryz, mindet ekendigin atap kórsetip, qazaq tilin meńgere almaı júrgenderge úndeý tastaıdy. «Eshten kesh jaqsy» degen halyq danalyǵy alǵa tartylyp, memlekettik tildi úırenýge eń bastysy ynta kerektigi aıtylady.
Qazaq halqy qaı zamanda bolmasyn ózge ulystarmen tatý birlikte ómir súre bilgen. Eshkimdi jatsynǵan joq. Bul tarıhı aqıqat. Memleket basshysy osy jaıly aıta otyryp, eldegi turaqtylyq pen bereke, birlik úshin bárimizdiń jaýapty ekendigimizdi durys aıtqan. Biz qashan bolsyn halqymyzdy biriktiretin ortaq qundylyqtardy dáriptep, sony oı sanaǵa berik ornyqtyrý jóninde aıtylǵan oıdy quptaımyn.
Táýelsizdigimizdiń altyn arqaýy jáne basty qundylyǵy ulttyq múdde ekendigine Memleket basshysy óz maqalasynda keńinen toqtalady. Biz ulttyq múdde men táýelsizdikti bárinen bıik qoıamyz. Halqymyzdyń bar jaqsy qasıetteri, ulttyq múddesi tek qana Táýelsiz eldiń jaǵdaıynda ǵana damyp, órisin keńeıte túsetindigin umytpaıyq», - dedi Murat Baqtııaruly.