Murat Baqtııaruly Qyzylorda oblysynda sý tapshylyǵy máselesin sheshýdi surady

NUR-SULTAN. QazAqparat – Senattyń jalpy otyrysynda depýtat Murat Baqtııaruly elimizdiń Premer-Mınıstriniń atyna joldaǵan depýtattyq saýalynda Qyzylorda oblysyndaǵy sý tapshylyǵy máselesin kóterdi, dep habarlaıdy QazAqparat tilshisi.

Depýtattyń aıtýynsha, Qyzylorda oblysynyń áleýmettik-ekonomıkalyq jaǵdaıy Syrdarııa ózeni basseınin sýmen qamtamasyz etýge jáne sýarmaly jerlerdiń melıoratsııalyq jaǵdaıyna tikeleı baılanysty. Oblys transshekaralyq ózenniń tómengi aǵysynda ornalasqan, sondyqtan onyń joǵarǵy aǵysynan keletin sý kólemine táýeldi.

Osyǵan baılanysty Syrdarııa ózeniniń joǵarǵy aǵysynda ornalasqan memleketterge sý táýeldiliginiń tómendeýi óńir úshin óte mańyzdy bolyp otyr. Depýtattyń pikirinshe, Qaraózek jáne Kúmisketken sý qoımalaryn salý bul máseleni sheshýge kómektesedi.

«2022 jylǵa arnalǵan respýblıkalyq bıýdjettiń parametrlerinde Kúmisketken sý qoımasyna ári Qaraózek sý qoımasynyń qurylysyn bastaýǵa 500 mln teńge qarjy qarastyrylýyna jáne sonymen qatar 30 myń gektar sýarmaly egistik jerlerin sýmen qamtamasyz etý maqsatynda, Ekologııa, geologııa jáne tabıǵı resýrstar mınıstrliginiń «Qazsýshar» RMK sý jetkizip berý qyzmeti esebinen Qyzylorda oblysy Jańaqorǵan aýdanynda sý tospasyn qaıta salýǵa yqpal jasaýyńyzdy suraımyn»,- dedi depýtat.