Murat Baqtııaruly: «Eńbek» baǵdarlamasyna tereń taldaý jasaý kerek

NUR-SULTAN. QazAqparat – Senator Murat Baqtııaruly «Eńbek» memlekettik baǵdarlamasynyń júzege asý barysyn synǵa aldy. Depýtattyń esepteýinshe bul baǵdarlamany tolyq ózgertý kerek, dep habarlaıdy QazAqparat tilshisi.

«Jyl saıyn jumyspen qamtýǵa qanshama qarajat jumsaǵanymyzben jumyspen qamtylǵandar azaımaı, eńbek naryǵyndaǵy ahýal durystala qoıǵan joq. 2019 jyly ataýly áleýmettik kómek alýshylar sany 2 mıllıonnan asyp ketti. Jalpy bizdiń pikirimizshe, «Eńbek» - halyqqa áleýmettik kómek beretin baǵdarlama emes, jumys izdeýshilerdi, naryqqa qajetti jumysshy mamandyqtardy oqytyp, olarǵa jumys oryndaryn ashýǵa tıisti edi. Ókinishke qaraı bul baǵytta nátıje az. Mysaly nátıjeli jumyspen qamtýdyń jáne kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasyn júzegea asyrý úshin 2017 jyldan beri 186 mlrd teńge bólinip, 40 myńǵa jýyq nesıe berilgen», - dedi Murat Baqtııaruly Parlament Senatynyń otyrysynda.

Onyń aıtýynsha osy baǵdarlama sheńberinde oqytylǵan 80 myń adamnyń 23 myńy ǵana mamandyǵyna saı jumysqa ornalasqan. Sáıkesinshe 6 mlrd teńge naryqta suranysy joq mamandyqtardy oqytýǵa jumsalǵan. Senatordyń esepteýinshe tıimdiligi syn kótermeıtin «Eńbek» baǵdarlamasyna tereń taldaý jasap, qajet bolǵan jaǵdaıda bul baǵdarlamany tolyq ózgertý kerek.

«2019 jyly azyq-túlik taýarlarynyń baǵasynyń ósýi halyqtyń aqshalaı shyǵystarynyń qurylymynda 50 paıyzdy aldy. Al damyǵan elderde bul kórsetkish 10 paıyz sheginde ǵana. ıAǵnı halqymyzdyń tapqan tabysy azyq-túlik alýǵa ǵana ketip jatyr. Halyqtyń qaryzǵa kirýi áleýmettik problemalarǵa ákep soqtyrýy múmkin. Demek elimizdegi azamattardyń tómengi kúnkóris deńgeıi men eń tómengi jalaqy mólsheri qazirgi jaǵdaıǵa sáıkes kelmeıdi», - dedi ol.

Osy máselelerge baılanysty senator Úkimetke eń tómengi jalaqyny qazirgi ómir talaptaryna sáıkestendirýdi tez arada qolǵa alýdy surady.