Murat Áýezov seksen jasqa toldy

ASTANA. QazAqparat - Búgin belgili shyǵystanýshy, túrkitanýshy, mádenıettanýshy ǵalym, qazaq dıplomatııasynyń qaıratkeri Murat Muhtaruly Áýezov 80 jasqa toldy, dep habarlaıdy QazAqparat.

«Atamura» baspa korporatsııasynyń prezıdenti Rahymǵalı Qul-Muhammed Fasebook paraqshasynda Murat Áýezovti quttyqtady.

«Búgin qazaqtyń zańǵar jazýshysy Muhtar Áýezovtiń uly, belgili shyǵystanýshy, túrkitanýshy, mádenıettanýshy ǵalym, tamasha esseıst, qazaq dıplomatııasynyń qaıratkeri Murat Áýezov 80 jasqa tolyp otyr. Osyǵan oraı yrymshyl halyqtyń balasy retinde qoıan jylynyń alǵashqy kúnin Áýezovter shańyraǵyna baryp, Murat aǵany mereıtoıymen quttyqtaýdan bastadym» – dep jazdy Rahymǵalı Qul-Muhammed.

Murat Muhtaruly Áýezov 1943 jyly qańtar aıynyń 1 juldyzynda Jambyl oblysynyń Merki kentinde dúnıege kelgen.

Ǵalym M.V. Lomonosov atyndaǵy Máskeý memlekettik ýnıversıtetiniń Shyǵys tilderi ınstıtýtyn «Qytaı fılologııasy» mamandyǵy boıynsha bitirdi. KSRO Ǵylym Akademııasynyń Álem ádebıeti ınstıtýtynda ádebıet teorııasy boıynsha fılologııa ǵylymdarynyń kandıdaty dárejesi úshin dıssertatsııa qorǵady. Qazaqstan Jýrnalıstıka Akademııasynyń tolyq múshesi.

Murat Áýezov «Qazaqfılm» kınostýdııasynda bas redaktor (1981-1987), Qazaqstan Jazýshylar odaǵynyń kórkem aýdarma jáne ádebı ózara baılanystar jónindegi alqasynyń basshysy (1988-1990), Qazaqstandaǵy «Mır» teleradıokompanııasynyń kórkemdik jetekshisi (1990), Qazaq KSR Joǵarǵy Keńesiniń depýtaty bolyp saılanyp, Keńes Prezıdıýmynyń múshesi, parlamentaralyq baılanystar jónindegi komıtettiń tóraǵasy (1990), Qazaqstan Respýblıkasy Ulttyq kitaphanasynyń dırektory (2003-2006) sekildi joǵary qyzmetterdi atqardy.

Murat Muhtarulynyń «Vremen svıazýıýşaıa nıt», «Ippokrena. Hojdenıe k kolodtsam vremen» eńbekteri bar.