Murat Ábenov: memlekettik organdar áleýmettik jelilerdi belsendi paıdalanýy tıis
Qazaqstannyń memleket jáne qoǵam qaıratkeri Murat Ábenov «Memlekettik qyzmettegi minez-qulyq ádep standarttary: tájirıbe jáne jetistikter» atty respýblıkalyq forýmda sóz sóılep, usynystaryn ortaǵa saldy. Ol konferentsııa barysynda memlekettik qyzmettiń jańa modeli halyqpen barynsha ashyqtyqty ustanatynyn atap ótti. Sondaı-aq, jańa formatsııanyń memlekettik qyzmetshileri memleket pen qoǵam arasyndaǵy alshaqtyqty qysqartýǵa tıis.
«Elbasy memlekettik organdardyń ashyqtyǵy týraly únemi qozǵap keledi. Bıylǵy Joldaýynda da bul máseleni basa aıtty. Rasynda, memlekettik qyzmetshi qandaı bolýy qajet? Osy suraq memlekettik qyzmetke jańa qadam basqan árbir jasty oılandyrýy tıis. Olar jumysqa turǵan kúnnen bastap, halyq pen bıliktiń arasyn alshaqtatpaýdy negizge alǵandary abzal. Prezıdentimiz jańa memlekettik qyzmetshiniń modelin qurý týraly tapsyrma berdi. Muny men álemde bolyp jatqan ózgeristerge qarap, sonyń balamasynda iske asatyn tıimdi tájirıbe dep esepteımin», - dedi Murat Ábenov.
Qoǵam qaıratkeri memqyzmettegi ońtaılandyrý týraly da pikir bildirdi. Onyń sózinshe, Memlekettik qyzmet isteri jáne sybaılas jemqorlyqqa qarsy is-qımyl Agenttigi osy turǵyda jemisti jobalardy qolǵa aldy.
«Memlekettik qyzmettegi ońtaılandyrýdyń arqasynda jumys sapasy artty. Jas qyzmetkerlerge qosymsha stımýl paıda boldy. Men memlekettik qyzmetshi bolmasam da, agenttiktiń atqaryp kele jatqan jumystarymen tanyspyn. Alık Shpekbaev qoǵam belsendileri arqyly halyqqa jaqyndaýdyń joldaryn tapty. Ol memlekettik organdarǵa áleýmettik jelilerdi paıdalanyp, turǵyndarmen keri baılanys jasaýdy usyndy. Menińshe, bul qoldaıtyn bastama. Saraptama júrgizip kórdim, qazaqstandyqtardyń 91 paıyzy smartfon qoldanady. Máselen, osydan 2-3 jyl buryn QR ІІM avtooryndyq týraly normany qabyldady. Alaıda, jurttyń áleýmettik jelilerdegi narazylyǵy saldarynan bul másele keıinge shegerildi. Osyndaı mysaldardy saralaı kele, memlekettik organdar halyqpen barynsha ashyq bolýy tıis degen tujyrym shyǵaramyz», - deıdi ol.
Eske salsaq, Elbasy bıylǵy Joldaýynda memlekettik organdar qyzmetiniń tıimdiligin túbegeıli arttyrýdy tapsyrdy.