Muraǵatty kúzetý polıtsııaǵa júktele me

NUR-SULTAN. QazAqparat - Óńirlik muraǵattardy kúzetýge lıtsenzııalanǵan kúzet uıymdaryn tartý tájirıbesin jalǵastyrǵan durys. Bul jaıynda Senat depýtattarynyń resmı saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.

«Búgingi kúni 5 respýblıkalyq muraǵat (QR Ulttyq muraǵaty, Ortalyq memlekettik muraǵat, Ortalyq memlekettik kıno-foto qujattar jáne dybys jazbalary muraǵaty, Ortalyq memlekettik ǵylymı-tehnıkalyq qujattamalar muraǵaty, Ulttyq qoljazbalar jáne sırek kezdesetin kitaptar ortalyǵy) memlekettik kúzetpen qamtamasyz etilgen. 200-den astam óńirlik memlekettik muraǵat lıtsenzııasy bar kúzet uıymdarymen nemese olardyń shtattyq qyzmetkerlerimen kúzetiledi», - dedi Asqar Mamın.

Osy oraıda Úkimet basshysy jergilikti muraǵattardy memleket kúzetetin nysandar tizbesine qosý polıtsııa qyzmetkerleriniń aıtarlyqtaı sanyn tartýdy talap etetindigine nazar aýdartady.

«Mundaı qadam ishki ister organdaryn reformalaý úshin júrgizilip jatqan mindetke qarama-qaıshy keledi. Atalǵan mindettiń biri polıtsııany vedomstvolyq kúzet qyzmetinen bosatý sanalady. Osyǵan oraı, óńirlik memlekettik muraǵattardy kúzetýge lıtsenzııalanǵan kúzet uıymdaryn tartý tájirıbesin jalǵastyrý maqsatqa saı keledi dep esepteımin», - dedi Premer-Mınıstr.