Mundaı jedelhat eks-prezıdentterge sırek joldanady - Abaev Tramptyń haty jaıly

NUR-SULTAN. QazAqparat - AQSh Eýrazııada beıbitshilikti nyǵaıtýda Qazaqstannyń bastamalaryna, sondaı-aq ıadrolyq qarýsyzdanýǵa, álemdegi kıkiljiń bolǵan jerlerge gýmanıtarlyq kómek joldaý sekildi bastamalaryna joǵary baǵa berip keledi. Mundaı pikirdi QR Aqparat jáne qoǵamdyq damý mınıstri Dáýren Abaev bildirdi dep habarlaıdy QazAqparat tilshisi.

«Bul hat - Donald Tramptyń Nursultan Nazarbaevqa degen zor qurmetin kórsetedi. Osy rette dıplomatııalyq hattama Elbasyǵa hat joldaýdy mindettemegen. Jalpy, mundaı jedelhattar eks-prezıdentterge sırek joldanatynyn atap ótý kerek. Sol sebepti, amerıkalyq prezıdenttiń haty - Nursultan Nazarbaevtyń ekijaqty qarym-qatynasty nyǵaıtýda ǵana emes, kóptegen jahandyq bastamalaryn da AQSh-tyń joǵary baǵalaıtynyn kórsetedi», - deıdi deıdi Dáýren Abaev Habar arnasyndaǵy «Ashyq dıalog» baǵdarlamasynda.

Mınıstr óz sózinde AQSh óz kezeginde Qazaqstan úshin ekinshi salmaqty ınvestor sanalatynyn atap ótti.

«Sońǵy 15 jylda ǵana ol jaqta 30 mlrd dollar tikeleı ınvestıtsııa bizdiń ekonomıkaǵa kelip túsken. Eń joǵarǵy jahandyq alańdarda amerıkalyq taraptyń ókilderi Eýrazııada beıbitshilikti nyǵaıtýda Qazaqstannyń bastamalaryna, sondaı-aq ıadrolyq qarýsyzdanýǵa, jer sharynyń ystyq núktelerine gýmanıtarlyq kómek joldaý sekildi jumysyna joǵarǵy baǵa berip keledi. Osynyń bári - Nursultan Nazarbaev aıqyndap bergen elimizdiń syrtqy saıası baǵdarynyń durys ekenin pash etedi», - deıdi Dáýren Abaev.

Eske sala ketsek, AQSh Prezıdenti Donald Tramp QR Tuńǵysh Prezıdenti - Elbasy Nursultan Nazarbaevqa hat joldaǵan bolatyn. AQSh Prezıdenti Donald Tramp Elbasy Nursultan Nazarbaevtyń Qazaqstandy basqarǵan 30 jylǵa jýyq ýaqyttyń ishinde mol mura qaldyrǵanyn atap ótip, bılik tranzıtin konstıtýtsııalyq protsedýralarǵa saı júzege asyrý sheshimine qoldaý bildirgen. Sonymen qatar, ol 2018 jylǵy Elbasynyń Aq úıge sapary AQSh pen Qazaqstan arasyndaǵy yntymaqtastyqty tereńdetýge baǵyttalǵan qadam bolǵanyn atap ótken.