Munaıly jastary zaǵıptarǵa arnalǵan jobany qolǵa aldy

NUR-SULTAN. QazAqparat - Múmkindigi shekteýli jandardyń bos ýaqytyn tıimdi ótkizý, olardy qoǵamǵa tartý, tipti jumyspen de qamtý - bul Mańǵystaý oblysy Munaıly aýdany Mańǵystaý aýylynyń turǵyny, «Zaǵıptyń da jaryǵy bar!» jobasynyń negizin qalaýshy Qarlyǵash Qaldybaıdyń kózdegen maqsaty, dep habarlaıdy QazAqparat.

Qarlyǵashtyń bul jobasy kózi kórmeıtin múgedekterge relefti núkteli Braıl júıesinde jazýǵa jáne sporttyq oıyn túrlerin úıretýge baǵyttalǵan.

Qarlyǵash aınalasyndaǵy jaqyndarynyń arasynda kózi kórmeıtin jandar bar bolǵandyqtan, olardyń qajettilikteri men qyzyǵýshylyqtaryn jaqsy biledi. Sol sebepti de osyndaı áleýmettik jobany qolǵa alǵan. 2019 jyly Zhas Project jobasyna qatysqan Qarlyǵash grantty óz ıdeıasyn júzege asyrýǵa jumsady. Jobanyń mindeti dúnıe jaryǵyn kórýden qaǵylǵan jandardyń ómirin jeńildetý, kómek qolyn sozý. Olarǵa arnalǵan bilim alý, demalý ortalyǵyn qurý bolyp tabylady.

Endi óńirdegi zaǵıp jandar doıby men shahmat oınaýdy jáne Braıl júıesinde jazýdy meńgerip júr. Sabaqtar aptasyna eki ret seısenbi jáne beısenbi kúnderi ótkiziledi. Qajetti qural-jabdyqtar tapsyryspen Almaty qalasynan alyndy. Kózi kórmeıtinderge arnalǵan ústel oıyndary ádettegi nusqalarynan ózgeshe. Fıgýralar oıynshylardyń múmkindikterine saı jáne oınaýǵa yńǵaıly etip jasalǵan. Mysaly, aq tústileri bıik bolsa, qara músinderi birshama oıyq bolyp keledi.

«Zaǵıptyń da jaryǵy bar!» jobasy oıdaǵydaı júzege asty. Zhas Project qoldaýynyń arqasynda eshqandaı qıyndyqtar týyndaǵan joq. Barlyǵy kelisim boıynsha jasaldy. Jobany odan ary aqyly túrde jalǵastyramyz degen oıymyz boldy. Biraq ony keıinge qaldyrdyq. Qazir de zaǵıp jandar doıby, shahmat oınaý úshin ortalyqqa kelip júredi», - deıdi Jobanyń avtory.

Zaǵıptar ómirdiń taýqymetin kórse de, álemdi janarmen emes, janymen súıe biledi. Sondyqtan joba avtorlary olardyń bos ýaqytyn tıimdi ótkizýine de jaǵdaı jasaýdy jón kórdi. Bul da jobanyń bir ereksheligi bolyp tabylady. Ár aıdyń sońynda týǵan kún ıeleri úshin merekelik dastarhan jaıylyp, syılyqtar tabystalady. Sondaı-aq, basqa da tanymdyq sharalar men trenıngter uıymdastyrylady. Osynyń barlyǵy zaǵıptardyń ómirge basqasha kózqaraspen qaraýyna septigin tıgizedi.

Búginde ortalyqta Braıl jazýy boıynsha bilim alǵandar oblystyq deńgeıdegi túrli jarystarǵa qatysyp, júldeli oryndardy ıelenip júr. Bolashaqta Munaılyda tirkelgen barlyq zaǵıptardy ortalyqtaǵy aqysyz úıirmelerge tartý kózdelgen.

«Zhas Project sekildi jobalar óte mańyzdy. Bul bizdiń qoǵamǵa asa qajet. Bir jaǵynan, bul jastarǵa óz ıdeıalaryn júzege asyrýǵa múmkindik beredi, sondaı-aq elimizde túrli áleýmettik jobalar qolǵa alynyp, halyqqa óz paıdasyn tıgizedi», - deıdi Qarlyǵash Sársenbaıqyzy.

Qazirgi kezde oblystaǵy 90-ǵa jýyq zaǵıp jan bos ýaqyttaryn ortalyqta ótkizip, sabaqtarǵa belsendi qatysyp júr. Kelemin deýshilerge ortalyq esigi árdaıym ashyq. Joba týraly tolyq aqparatty Instagram-daǵy @zagiptar_qogamy paraqshasynan oqýǵa bolady.