Munaıly óńir balýandary arasynda «Atyraý barysy» anyqtaldy
Atyraýdaǵy «Nursaıa» sport kesheninde «Qazaqstan barysy» respýblıkalyq týrnıriniń irikteý kezeńi ótti. Jarys bastalar aldynda 15 balýan arasynda jerebe tartyldy.
Onyń ishinde 7 aýdannan 13, Atyraý qalasynan 2 balýan bar. Olar 92 keliden joǵary salmaqta baq synady.
«Balýandar arasynda qazaq kúresi tanymal bola bastady. Biraq, upaı sanymen alda turǵan balýan bir sekýndta utylyp qalýy múmkin. Óıtkeni, bul sporttyń osyndaı ereksheligi bar», -deıdi aǵa jattyqtyrýshy Aıbek Serǵazıev.
Bala kezinen qazaq kúresin serik etken balýannyń biri – Bekbol Muqashev.
«Qazaq kúresimen 6 jasymnan shuǵyldanamyn. Jekpe-jek sportynyń bári unaıtyn. Sonyń ishinde qazaq kúresin tańdadym», -deıdi Bekbol Muqashev.
Al, 27 jastaǵy Arman Qalıev bıylǵy irikteý jarysqa tórtinshi ret qatysty. Ásirese, dzıýdodan sport sheberi Ádilet Saparǵalıevpen beldesýi tartysty ótti.
«Jartylaı fınaldaǵy beldesý ońaı bolmady. Ádilet – qazaq kúresin myqty meńgergen balýan. Dzıýdodan Qazaqstan chempıony atanǵan. Bul kúreste samboshylar, dzıýdoshylar jáne basqa da jekpe-jek túrleriniń ókilderi baq synap júr. Biraq, men jeńilmeý úshin namysqa tyrystym» -deıdi Arman Qalıev.
Qarsylasynyń bárin utqan Arman Qalıev «Atyraý barysy» atandy. Oǵan úzdik balýan ataǵymen birge 500 myń teńgeniń sertıfıkaty berildi.
Ekinshi orynnyń júldesi – 300 myń teńgeni Qyzylqoǵa aýdanynan qatysqan Bekbol Muqashev ıelendi. Al, úshinshi oryn men 200 myń teńgeni Jylyoı aýdanynyń balýany Bekzat Shaǵataev jeńip aldy.
Eske sala ketelik, budan buryn Atyraýlyq sportshy pankratıonnan álemniń eki dúrkin chempıony atanǵanyn habarlaǵan edik.
Foto: Atyraý ÓKQ