Munaıdyń syrtqa shamadan tys tógilýinen jer silkinisi qaýpi artady – TJM

ASTANA. QazAqparat – Munaıdyń tógilýi tehnogendik sıpattaǵy úlken apattarǵa ulasýy yqtımal. Mundaı málimetter Ashyq NQA portalynda jarııalanǵan Qazaqstanda seısmologııa salasyn damytýdyń 2024-2028 jyldarǵa arnalǵan keshendi josparynda jazylǵan, dep habarlaıdy QazAqparat tilshisi.

«Munaı men gazdy óndirý lıtosferanyń joǵarǵy qabatyn zaqymdaıdy. Nátıjesinde ol turaqsyz kúıge túsedi de, keıin túrli tehnogendik apattar, jer silkinisteri bolady. Qazaqstannyń batys óńirleriniń seısmıkalyq jaǵdaıy jetkiliksiz dárejede zerttelgen. Sondyqtan munaıdyń tógilýin boldyrmaý, onyń aldyn alý maqsatyna zertteý júrgizý qajet», - delingen keshendi josparda.

Quzyrly vedomstvo ýaqtyly ári dál seısmıkalyq boljam jasaý úshin tıisti deńgeıde ınfraqurylymdy damytýdy jáne jańa tehnologııalardy engizýdi usynady.

«Seısmıkalyq qaýipsizdikti qamtamasyz etý úshin seısmologııa salasyn damytý, qurylystardyń seısmıkalyq tózimdiligin anyqtaý jáne tsıfrlyq tehnologııalardy keńinen engizý qajet. Munymen qatar, bilikti kadrlardy daıarlaý protsesin sapaly jańa deńgeıge kóterý mańyzdy», - dep bastama kótergen Tótenshe jaǵdaılar mınıstrligi.

Vedomstvo dereginshe, elimizdegi seısmıkalyq qaýip joǵary óńirlerde 7 mıllıonnan astam adam turady jáne onda otandyq ónerkásip áleýetiniń 50% shoǵyrlanǵan.