Munaı zaýyttaryn jańǵyrtýdan keıin satyp alǵan durys

ASTANA. QazAqparat - Qazaqstandaǵy iri úsh munaı óńdeý zaýyty modernızatsııa jumystarynan keıin ǵana jekeshelendirýge shyǵarylýy múmkin. Bul týraly búgin halyqqa esep berý kezdesýinde QR Energetıka mınıstri Qanat Bozymbaev málim etti.

Mınıstrdiń aıtýynsha, modernızatsııadan keıin Atyraý munaı óńdeý zaýytynda ǵana ashyq tústi munaı ónimderiniń óndirisi qazirgi 40 paıyzdan 92 paıyzǵa deıin artpaq.

«Meniń oıymsha, eń aldymen, munaı óńdeý qýatyn modernızatsııalaý kerek. Eger qazir kásiporyndardy satatyn bolsaq, olardy 40-50 jyl tarıhy bar aktıv retinde satamyz. Tıisinshe, zaýyttardyń baǵasy da qymbat bolmaıdy», - dedi suraqqa jaýap bergen Q.Bozymbaev.

«Sáıkesinshe, munaı óńdeý tıimdiligi eki eseden joǵary bolady. Baǵasy da basqa bolmaq. Sondyqtan, eń aldymen, modernızatsııa júrgizgen jón. Osydan keıin ishki naryqqa munaı ónimderin kim jetkizse de, báribir emes pe? Bastysy, shıkizat, naqty erejeler jáne tıimdi sharttar bolaýy tıis», - dedi Q.Bozymbaev.